१६ कात्तिक, विराटनगर ।
मिथिलाञ्चलको साझा चाड छठ पर्वको अवसरमा मुस्लिम समुदाय पनि सहभागि भएका छन् । छठ पर्वमा घाटसम्म पुग्नेहरुका लागि उनीहरुले निः शुल्क पिउने पानी वितरण गरेर छठ पर्वमा अप्रत्यक्ष सहभागिता जनाएका हुन् । भाइचारा, एकता र सद्भावको पर्व मानिने छठको अवसरमा शनिबार विराटनगर–६ स्थित छठ घाटमा पूजा आराधाना गर्न आउने श्रद्धालुहरुका लागि निः शुल्क पिउने पानी वितरण गरिएको हो ।
नेपाल मुस्लिम युथ कमिटी, कौमी एकता मन्च र जमाली प्रिन्टिङ प्रेसको संयुक्त आयोजनामा पानी र कफी वितरण गरिएको मुस्लिम अगुवा जफर अहमद जमालीले जानकारी दिए । उनले समाजमा एक अर्का धर्मप्रति सम्मान र विविध धार्मिक सहिष्णुता संगै सामाजिक सद्भाव बनाउन आवश्यक रहेकोले सो कार्य गरिएको बताए ।
एक अर्काको धार्मिक मान्यता, आस्था र विश्वासमा जोड दिन पनि छठ पर्वमा पानी वितरणका माध्यमबाट आफूहरु सहभागि भएको नेपाल मुस्लिम युथ कमिटीका इमाम हैदरले बताए । निशुल्क पानी तथा कफी वितरणमा सहभागि भएका मुस्लिम अगुवा अदिप कामिल जमालीले आजको दिन आफूले आनन्द महसुस गरेको बताए ।
उनीहरुले हिन्दुधर्मालम्बीहरुको चाडपर्व विशेष अन्य सामूहिक समारोहहरुमा पनि यस्तै सहयोग गर्ने योजना बनाएको बताएका छन । हिन्दुहरुले मनाउने चाड भएपनि यस पर्वलाई पछिल्लो समय अन्य समुदायले पनि मनाउन थालेका छन् । यसलाई सामाजिक सद्भावको पर्वका रुपमा पनि चित्रण गरिन्छ ।
