काठमाडौं, फागुन १५
संघीय संसदका नवनिर्वाचित सदस्यहरुले यही फागुन २० गते सपथ लिने भएका छन । राष्ट्रपति विद्या भण्डारीले फागुन २१ गते संघीय संसदको पहिलो अधिवेशन आह्वान गरेकाले त्यसको अघिल्लो दिन २० गते नवनिर्वाचित सदस्यहरुको सपथ लिने व्यवस्था गरिएको हो ।
संवैधानिक व्यवस्था अनुसार अधिवेशन अघि नै सपथ गर्नुपर्ने भएकाले फागुन २० गते नै सपथग्रहण कार्यक्रम आयोजना गरिएको संघीय संसद सचिवालयका प्रवक्ता डा. भरतराज गौतमले जानकारी दिए ।
फागुन २० गते ४ बजे प्रतिनिधिसभा र ५ बजे राष्ट्रिय सभाका सदस्यहरुको सपथग्रहण कार्यक्रम सम्बन्धित सभाकै हलमा राखिएको छ ।
दुवै सदनका जेष्ठ सदस्यले सम्बन्धित सभाका सदस्यहरुलाई सपथ गराउने छन । दुवै सदनको जेष्ठ सदस्यलाई भने राष्ट्रपतिले सपथ गराउने प्रवक्ता गौतमले बताए ।
प्रतिनिधिसभामा राष्ट्रिय जनता पार्टी, नेपालका ८० वर्षीय महेन्द्र राय यादव जेष्ठ सदस्य रेका छन भने राष्ट्रियसभामा नेपाली कांग्रेसका ६९ वर्षीया तारादेवी भट्ट जेष्ठ सदस्य रहेकी छन् ।
संघीय संसद सचिवालयले संसदको पहिलो अधिवेशन सम्पन्न भएलगत्तै प्रतिनिधिसभाका सभामुख, उपसभामुख तथा राष्ट्रियसभाका अध्यक्ष, उपाध्यक्षको निर्वाचनको कार्यसूचि तय गर्ने कार्यविधि पनि तयार पारेको छ ।
संवैधानिक व्यवस्था अनुसार संसदको पहिलो अधिवेशन सम्पन्न भएको १५ दिन भित्र प्रतिनिधिसभाका सभामुख, उपसभामुख र राष्ट्रियसभाका अध्यक्ष, उपाध्यक्ष चयन गरिसक्नु पर्नेछ ।
यसैगरी सरकार गठन भएको १ महिना भित्र विश्वासको मत लिनुपर्ने भएकाले त्यसको मिति तय गर्न संसद सचिवालयले दलहरुसँग बुधबार परामर्श गर्ने भएको छ ।
प्रधानमन्त्रीले विश्वासको मत लिने मिति पनि तय गरेर अघि बढने संसद सचिवालयको तयारी छ । प्रतिनिधिसभामा कूल २ सय ७५ र राष्ट्रिय सभामा ५९ जना सदस्य रहेका छन । फागुन २१ गते दुवै सदनको संयुक्त बैठक बस्नेछ ।
