विराटनगर, फागुन २०
विराटनगरमा हिजो विहान गाडीमा मृत फेला पारेका उर्लाबारी ७ का सनम शाक्यको आर्थिक लेनदेनका कारण हत्या भएको प्रहरीले जनाएको छ ।
आर्थिक लेनदेनको कारण शाक्यलाई शारिरीक यातना दिएर तथा करेन्ट लगाएर हत्या गरिएको प्रहरीको प्रारम्भिक अनुसन्धानको क्रममा खुलेको छ । जिल्ला प्रहरी कार्यालय मोरङले आज पत्रकार सम्मेलन गरि यस्तो जानकारी गराएको हो ।
मृतक शाक्यको शव बरामदसंगै प्रहरीले ३ जना अभियुक्त र उनीहरुले प्रयोग गरेका गाडीबाट बरामद गरिएका बन्दोबस्तीका सामाग्रीहरुबाट समेत सो कुराको संकेत गरेको छ ।
प्रहरीले हत्यामा करेन्ट लगाउन प्रयोग गरिएको ब्याट्री र तारहरु समेत बरामद गरेको छ । मोरङ प्रहरी प्रमुख एसपी अरुणकुमार बिसिले मृतक सहित घटनामा संलग्नहरु सुनको कारोबारसंग जोडिएको प्रारम्भिक अनुसन्धनमा देखिएको पनि बताए ।
उनले मृतक शाक्यलाई अभियुक्तहरुले घरबाटै फोन मार्फत डाकेर आफूसंगै लिएर हिडेको र उर्लाबारी १ स्थित सोल्टी खोलाको किनारमा रहेको जंगलमा करेन्ट लगाउदै यातना दिएर हत्या गरेको देखिएको बताए ।
उनले योजना बनाएर हत्या गर्ने नियतमा हिडेका अभियुक्तहरु बन्दोबस्तीका सामानसहित कसैलाई शंका नहोस भनेर खोला र जंगल किनारमा बसेको बताए ।
शाक्यको हत्या उर्लाबारीको जंगलमा गरिएपनि बोर्डर छेउमा शवको ब्यवस्थापन गर्न उनीहरु विराटनगर आएको हुनसक्ने प्रहरीको अनुमान छ ।
महानगरीय प्रहरी अपराध महाशाखा काठमाडौ र जिल्ला प्रहरी कार्यालय मोरङको संयुक्त टोलीले हिजो बिहान विराटनगर ३ को गोधुली मार्गबाट हत्या गरिएको शाक्यको शव सहित मोरङ उर्लाबारी ५ का मोहन काफ्ले,वडा नम्बर ७ का कृष्ण भन्ने नरेन्द्र कार्की र काभ्रे, देउपुर गाउपालिकाका टेकराज मल्ल ठकुरीलाई नियन्त्रणमा लिएको थियो ।
उनीहरुलाई संगठित अपराध तथा अपहरण, कर्तब्य ज्यान मुद्धा दर्तागरि ७ दिनको म्याद थप गरिएको प्रहरीले जनाएको छ ।
