८ मंसिर, काठमाडौं ।
प्रदेश एकले आफ्नै लगानीमा एक हजार ५ सय मेगावाटका जलविद्युत आयोजना निर्माण गर्ने प्रतिबद्धता जनाएको छ । काठमाडौं भएको ऊर्जा सम्मेलनका क्रममा प्रदेश एकका मुख्य मन्त्री शेरधन राईले उक्त प्रतिबद्धता व्यक्त गरेका हुन् । सम्मेलनको दोस्रो दिन शुक्रबार ‘ऊर्जा परियोजनाको सहजीकरण र नियमनः संघीयतामा ऊर्जा विकासको लाभ बाँडफाँडका चुनौती’ विषयक सत्रलाई सम्बोधन गर्दै मुख्यमन्त्री राईले प्रदेश आफैंले आयोजना निर्माणमा जोड दिने बताए ।
‘प्रदेशले सार्वजनिक–निजी–साझेदारी (पिपिपी) मोडलमा आयोजना निर्माण गर्न लागेको छ,’ मुख्यमन्त्री राईले भने, ‘जलविद्युतमा ३४ प्रतिशत उत्पादन क्षमता रहेको यो प्रदेश नेपालकै ऊर्जा क्षेत्रको अधिक सम्भावन पनि छ ।’ प्रदेशका अरुण, तमोरसहितका अन्य नदीमा आकर्षक आयोजना रहेकाले उपयुक्त वातावरण सिर्जना गरेर निर्माणमा लैजाने उनको भनाइ थियो । उत्पादन मात्रै नभएर अरू ठूला पूर्वाधारमा लगानी भित्र्याउन प्रदेश १ ले २० वटा आयोजना तयार पारेको पनि उनले जानकारी दिए ।
प्रदेश १ मा हुने आयोजना निर्माण र पूर्वाधार विकासमा सहज तथा छोटो प्रक्रिया अवलम्बन गर्न प्रदेश सरकारले सहजीकरण गर्ने छ । यसका लागि एकद्वार प्रणालीबाट आयोजनाको काम अगाडि बढाइने भएको छ । मुख्यमन्त्री राईले प्रदेशले १ हजार ५ सय मेगावाटका आयोजना आफ्नै कार्यकालमा तयार पार्ने गरी अगाडि बढेको उनले जानकारी दिए । उनका अनुसार एकदेखि तीन वर्षभित्र पूरा हुने आयोजनालाई प्राथमिकता दिएर अगाडि सारिएको छ । आयोजना निर्माण हुने जग्गा प्राप्तिको समस्या, निर्माणमा सरकारले दिने सहजताका विषयमा एक महिनाभित्रै उपयुक्त निर्णय आउने छ । यसका लागि सार्वजनिक जग्गाको खोजी गरेको र सोको विवरण एक महिनाभित्रै आउने उनले बताए ।
