विराटनगर, फागुन २२
नेपाल संगीत तथा नाट्य प्रज्ञा प्रतिष्ठान र सांस्कृतिक संस्थाको संयुक्त आयोजनामा आजदेखि विराटनगरमा राष्ट्रिय महिला नाट्य महोत्सव सुरु भएको छ ।
विराटनगर हाटखोला स्थित आरोहण गुरुकुलको सुशीला कोइराला नाटकघरमा नाट्य महोत्सव सुरु भएको हो । महोत्सवको १ नम्बर प्रदेशका आन्तरिक तथा कानुनमन्त्री हिक्मत कार्कीले उद्घाटन गरे ।
उनले नाटकको संवाद प्रस्तुत गरेर महोत्सवको उद्घाटन गरेका थिए । बिहीबारसम्म सञ्चालन हुने महोत्सवमा हरेक दिन तीनवटा नाटक मञ्चन हुनेछन् ।
आरोहण गुरुकुल, दहेजमुक्त मिथिला र मैथिली सेवा समिति सहआयोजक रहेको महोत्सवको पहिलो दिन आज प्रियका झाको कथा नई भेटल, भरत गुरागाईंको बन्द बाकस र कविता नेपालको सुनामी नाटक मञ्चन गरिएको थियो ।
विभिन्न समुदायको भाषा, संस्कृति नाटकमा झल्किन्छ । उद्घाटन समारोहमा नेपाल संगीत तथा नाट्य प्रज्ञा प्रतिष्ठानका प्राज्ञ परिषद् सदस्य रमेशरञ्जन झा, सांस्कृतिक संस्थानका महाप्रबन्धक राजेश थापा, साहित्यकार दधिराज सुवेदी, प्राडा टंक न्यौपाने, कलाकार माया पौडेल, महोत्सवको स्थानीय संयोजक प्रविणनारायण चौधरीलगायतले शुभकामना व्यक्त गरेका थिए ।
