एजेन्सी, मंसिर २३
न्यूजील्यान्डमा ज्वालामुखी विस्फोट हुँदा झन्डै २० जना मानिस घाइते भएका छन् । सोमबार स्थानीय समय अनुसार दिउँसो २ः११ बजे भएको ज्वालामुखिमा परी केही सम्पर्कविहीन भएका छन् ।
देशको उत्तरपूर्वी भेगको ह्वकारी पनि भनिने ह्वाईट आईल्यान्ड नामक टापुमा ज्वालामुखी विस्फोट भएको हो। उद्धारकर्मीहरूका अनुसार घाइतेमध्ये केही गम्भीर अवस्थामा छन्। घाइतेहरूको शरीर पोलेको छ।
न्यूजील्यान्डको क्रूज असोसिएशनका अनुसार एउटा पर्यटक बोकेको डुङ्गा पनि प्रभावित भएको छ। उद्धारकार्यका लागि नजिकैको ह्वकाताने नगरमा उद्धारकर्मीहरू परिचालित गरिएको छ। विस्फोट भएको समयमा उक्त ह्वाईट आईल्यान्डमा दर्जनौँ मानिसहरू रहेको बताइएको छ।
सन् २००१ यता त्यहाँ भएको यो पहिलो ज्वालामुखी विस्फोट हो। उद्धार निकायले वरपरको क्षेत्र जोखिमपूर्ण भएको जनाएको छ। विस्फोटपछि सो क्षेत्रमा च्याउजस्तो आकारमा विशाल धूँवाको मुस्लो देखिएको छ ।
लाईभ फीडबाट प्राप्त फोटोमा विस्फोट हुनुभन्दा केही मिनेट अगाडि त्यहाँको क्रेटर देखिन्छ । सक्रिय ज्वालामुखी रहेको भए पनि ह्वाईट आईल्यान्ड पर्यटकीय स्थल हो।
ह्वाईट आईल्यान्डमा विगतमा पनि कैयौँ ज्वालामुखी विस्फोटका घटना भएका छन्। तर मानिसहरू सोही क्षेत्रमा रहेका बेला भने यसअघि विस्फोट भएको थिएन।
