४ पौष, काठमाडौं । संघीय संसदको दुबै सदनको हिउँदे अधिवेशन आजदेखि सुरू हुँदैछ । दिउँसो ४ बजे बस्ने प्रतिनिधि सभाको बैठकको अध्यक्षता उपसभामुख शिवमाया तुम्बाहाङफेले गर्ने भएकी छन् ।
बैठकको कार्यसूची तय गर्न उपसभामुखले १ बजे संसद भवन बानेश्वरमा कार्यव्यवस्था परामर्श समितिको बैठक बोलाएकी छन् । तत्कालीन सभामुख कृष्णबहादुर महरालाई जबरजस्ती करणीको अभियोग लागेपछि असोज १३ गतेदेखि सभामुख पद रिक्त छ ।
सभामुखको अनुपस्थितिमा उपसभामुख तुम्बाहाङफेले बैठकको अध्यक्षता गर्न लागेकी हुन् । आजको बैठकमा पूर्वसांसद रामेश्वरप्रसाद ढुंगेलको निधनमा शोक प्रस्ताव पारित गरिने तुम्बाहाङफेले जानकारी दिइन् । राष्ट्रिय सभाको बैठकको भने कार्यसूची तय भइसकेको छ ।
राष्ट्रिय सभाको बैठकमा राष्ट्रपति कार्यालयको पत्र पढेर सुनाउने र त्यसपछि संसदीय दलका नेताहरूले सम्बोधन गर्ने कार्यसूची तय भएको संघीय संसद सचिवालयका सहायक प्रवक्ता दशरथ धमलाले बताए । सम्बोधनको कार्यक्रम सकिएपछि शोक प्रस्ताव पारित गरिने धमलाले जानकारी दिए ।
