२७ पुस, राजविराज ।
सोह्र दिनदेखि बेपत्ता सप्तरी राजगढ–३ नर्घो पूर्व टोलका एक कुखुरा व्यावसायी मृत फेला परेका छन्।
नर्घोस्थित रत्नसागर सार्वजनिक पोखरीमा ४५ वर्षीय सुर्यनारायण मण्डल मृत फेला परेको सप्तरी प्रहरीले जनाएको छ। घरदेखि साढे एक किलोमिटरको दुरीमा रहेको रत्नसागर पोखरीको डिलमा सञ्चालन गरेको कुखुरा फारमको रेखदेख गर्दै उनी फारममै बस्दै आएका थिए।
मण्डल १६ दिनअघि उधारो दिएको रकम उठाउन जान्छु भनी हिंडेको मृतकका भाइ ३५ वर्षीय शिवनारायण मण्डलले जानकारी दिए। मृतक मण्डलकी श्रीमती एक छोरा र एक छोरीका साथ १५ वर्षदेखि माइत बस्दै आएकी छिन्।
कसले मारेको हो वा आफैं मृत्यु भएको हो अनुसन्धान हुनुपर्ने भाइ शिवनारायणको माग छ। मृत्यु शंकास्पद भएपछि शवको पोष्टमार्टम राजविराजमा नगरी धरान पठाइएको प्रहरीले जानकारी दिएको छ।
प्रहरीका अनुसार मृत्यु भएको मिति तथा डुबेर वा अन्य कारणले मृत्यु भएको यकिन गर्न शव धरान पठाइएको हो। प्रमाण भेटिन्छ कि भनेर पोष्टमार्टमका लागि धरानस्थित बी.पी. कोइराला स्वास्थ्य विज्ञान प्रतिष्ठान पठाइएको जिल्ला प्रहरी कार्यालय सप्तरीका इन्स्पेक्टर यमलाल बन्जाडेले बताए।
