२६ माघ, विराटनगर ।
मोरङको सुन्दरहरैँचामा पसलाको ताल्चा फुटाएर मदिरा चोरी गर्ने दुई जनालाई प्रहरीले पक्राउ गरेको छ । मदिरा चोरी गरेको आरोपमा सुन्दरहरैचा –५ का २० वर्षीय धुर्वसिंह तामाङ र मनिस राईलाई प्रहरीले पक्राउ गरेको हो ।
जिल्ला प्रहरी कार्यालय मोरङका डिएसपी मानबहादुर राईका अनुसार शुक्रबार राती सुन्दरहरैचा नगरपालिका–५, बाँसबारी चोकमा रहेको साथी सप्लायर्स मदिरा पसलको गोदामको ताल्चा फुटाइ उनीहरुले गोदाम भित्र रहेको अन्दाजी ७० हजार बराबरको बिभिन्न ब्राण्डका मदिरा तथा पेय पदार्थ चोरी गरेका थिए ।
घटनापछि अनुसन्धानमा जुटेको प्रहरीको टोलीले उक्त चोरी मदिरा तामाङको घरमा लुकाइ राखेको अवस्थामा प्रिमियम AC Gold ३ कार्टुन, Hinwa Barberry golden raspberry २ कार्टुन, Hiwa golden १ कार्टुन, Alc Black १ कार्टुन, Blue Star १ कार्टुन, Golden Ring २ कार्टुन, Cocacola ३ प्याकेट बरामद फेला परेको थियो ।
चोरीमा संलग्न तामाङ र राईलाई नियन्त्रणमा लिइ बेलबारी प्रहरीले थप अनुसन्धान गरिरहेको जिल्ला प्रहरी कार्यालय मोरङले जनाएको छ ।
