२० फागुन, विराटनगर । आफ्नै महिला अनुयायीमाथि बलात्कार गरेको आरोप लागेका सिद्धबाबा भनिने कृष्णबहादुर गिरीलाई प्रहरीले सुनसरी अदालतबाट नियन्त्रणमा लिएको छ ।
उनले मंगलबार सुनसरी अदालतबाट आत्मसमर्पण गरेपछि नियन्त्रणमा लिइएको सुनसरीका डीएसपी विनोद शर्माले जानकारी दिए । गिरी उच्च अदालत विराटनगरबाट पूर्पक्षका लागि थुनामा राख्न अन्तिम आदेश भएकै दिन माघ ९ गते बिहीबार भारत भागेका थिए ।
उनलाई सुनसरीको चतराधामस्थित आफ्नै आश्रममा कात्तिक पहिलो साता बलात्कार गरेको आरोप लागेको थियो । बलात्कारको किटानी जाहेरी परेपछि सिद्धबाबा मंसिर १६ गते पक्राउ परेका थिए ।
जिल्ला अदालत सुनसरीका न्यायाधीश राधाकृष्ण उप्रेतीको इजलासले उनलाई गत पुस १४ गते तीन लाख धरौटीमा छाड्न आदेश दिएको थियो तर जिल्लाको आदेशविरुद्ध दुवै पक्ष उच्च अदालतमा पुगेका थिए ।
उच्च अदालत विराटनगरमा मुख्यन्यायाधीश तिलप्रसाद श्रेष्ठ र न्यायाधीश प्रेमराज कार्कीको संयुक्त इजलासले उनलाई थुनामा राखेर मुद्दाको पूर्पक्ष गर्न आदेश दिएको थियो ।
