२१ चैत, विराटनगर ।
झिः पुच विराटनगरले विपन्न समुदायका व्यक्तिहरुलाई खाना खुवाउन सुरु गरेको छ । लकडाउनका कारण दैनिक ज्याला मजदुरी गरी जीविकोपार्जन गर्दै आएका विपन्न समुदायका व्यक्तिलाई हरेक दिन एक छाक खाना खुवाउन सुरु गरेको हो ।
विराटनगरका विभिन्न स्थान पुगेर झि पुच आफैंले बनाएर प्याकिङ गरेको खाना उनीहरुलाई खुवाउन सुरु गरेको अध्यक्ष जयेन्त प्रधानाङ्गले जानकारी दिए । हरेक दिन १ सय २५ जनालाई खाना खुवाउने योजना रहेको उनले सुनाए । पहिलो बिहीबार र शुक्रबार गरी २ सय ५० जनालाई भात, दाल, तरकारी र अचार खुवाइएको वरिष्ठ उपाध्यक्ष हरिबहादुर श्रेष्ठले बताए । विपन्न वर्गका व्यक्तिका साथै अपाङ्ग, वृद्धवृद्धा, सुुरक्षाकर्मी लगायतलाई पनि खाना खुवाइएको श्रेष्ठले जानकारी दिए ।
शनिबारदेखि लकडाउन सफल बनाउन सडकमा खटिने सुरक्षाकर्मीहरुलाई खाजा र पानीको समेत व्यवस्था गर्ने तयारी गरिएको बताए । पछिल्लो समय विराटनगरमा विभिन्न संघसंस्था र व्यक्तिहरुले राहत वितरणलाई तीव्रता दिन थालेका छन् ।
