२५ चैत्र, वीरगञ्ज ।
लकडाउनको अवज्ञा गर्दै नेपालबाट भारततर्फ मदिरा तस्करी गर्ने एक जनालाई प्रहरीले मंगलबार बिहान पक्राउ गरेको छ।
बाराको प्रसौनी गाउँपालिका वडा नम्बर १ बस्ने ४१ वर्षिय अजय राउतलाई भारततर्फ लैजाँदै गरेको मदिरासहित नियन्त्रणमा लिएको पर्सा प्रहरीले जनाएको छ।
उनलाई ना १९ प २३४१ नम्बरको मोटरसाइकलसहित वीरगञ्ज १६ बाट पक्राउ गरिएको प्रहरीले जनाएको छ। पक्राउ परेका उनलाई आवश्यक कारवाहीको लागि आन्तरिक राजश्व कार्यालयमा बुझाइएको छ। यस्तै भारतबाट अवैध रुपमा नेपाल ल्याउँदै गरेको २५ बोरा खुर्सानीसहित ठेला प्रहरीले नियन्त्रणमा लिएको छ।
वीरगञ्ज महानगरपालिका वडा नम्बर १० आदर्शनगरस्थित ठाकुरराम क्याम्पसको पछाडिको बाटो प्रयोग गरी ल्याउँदै गरेको उक्त परिमाणको खुर्सानी नियन्त्रणमा लिइएको तर प्रहरीलाई देखेपछि ठेलावाला भागेको प्रहरीले जनाएको छ।
