२८ चैत, एजेनसी । अमेरिकाको न्युयोर्कमा कोरोना भाइरसको महामारीले तिव्ररुप लिँदै गइरहेकोेबेला न्युयोर्क सिटीमा एउटा सामुहिक चिहानमा कोफिनहरु गाडिँदै गरेको तस्वीर सार्वजनिक भएको छ । सो तस्वीरमा कोफिन भरिएको ठूलो खाल्डामा जान मानिसहरुले भर्याग प्रयोग गरिरहेको देखिन्छ ।
परिवार नभएका तथा अन्त्येष्टिका लागि खर्च गर्न नसक्ने मृतकहरुका लागि हार्ट आइल्यान्डमा यसरी सामुहिक अन्त्येष्टि गरिएको बताइएको छ । पछिल्लो तथ्यांक अनुसार अमेरिकाभरिकै तुलनामा न्युयोर्क राज्यमा कोरोना भाइरसको घटना सबैभन्दा बढि देखिएको छ ।
सो राज्यले विहिवार थप १० हजार व्यक्ति संक्रमित भएपछि कूल संक्रमित संख्या १ लाख ५९ हजार ९ सय ३७ पुगेको तथा ७ हजार जनाको ज्यान गइसकेको जनाएको छ । अमेरिकामा मात्र अहिलेसम्म जम्मा १६ हजार ६ सय ९७ जनाको संक्रमणका कारण मृत्यु भएको छ भने ४ लाख ६८ हजार ८ सय ९५ संक्रमित छन् जसमध्ये २५ हजार ९ सय २८ जना निको भएर घर फर्किएका छन् । (रासस)
