३० चैत, वीरगञ्ज । वीरगञ्जमा कोरोना संक्रमित तीन जना भारतीयसँग भेट गर्ने २६ जनालाई क्वारेन्टाइनमा राखिएको छ ।
कोरोना संक्रमित भारतीय नागरिकसँग भेट गरेका उनीहरुलाई शनिबार बेलुका नै छपकैया र घुसुकपुरस्थित मस्जिदबाट नियन्त्रणमा लिएर वीरगञ्जमा सिद्धार्थ माविस्थित क्वारेन्टाइनमा पर्साका एसपी गंगा पन्तले जानकारी दिइन् ।
वीरगञ्जबाट बिहिबार २४ जनाको थ्रोट स्वाब संकलन गरी परीक्षणका लागि हेटौंडामा पठाइएकोमा तीन जना बाहेक अरुको रिपोर्ट नेगेटिभ आएको थियो ।
रिपोर्ट नेगेटिभ आएका २१ जना र उनीहरुसँग प्रत्यक्ष सम्पर्कमा रहेका तीन जना मुस्लिम धर्म गुरु र दुई जना स्थानीयलाई पनि क्वारेन्टाइनमा राखिएको हो । क्वारेन्टाइनमा पठाएका मध्ये ४ नेपाली र २२ भारतीय नागरिक रहेको प्रहरीले जनाएको छ ।
जमाती सबैले सप्तरीमा आयोजित मुस्लिम धार्मिक सभामा आएपछि नेपालमै रहेको दावी गर्दै आएका छन् । तर उनीहरु वीरगञ्जको छपकैयास्थित मस्जिदमा आएको दुई साता मात्रै भएको बताइएको छ ।
संक्रमितहरुलाई नारायणी उपक्षेत्रीय अस्पतालको आइसोलेसनमा राखिएको छ ।
