११ वैशाख, रुपन्देही ।
सशस्त्र प्रहरी बलका गुल्मपति डिएसपी मानबहादुर शाहीमाथि व्यारेकभित्रै कुटपीट भएको छ ।
रुपन्देहीको सुनौली राजश्व गुल्मका प्रमुख डिएसपी मानबहादुर शाही माथि ब्यारेककै प्रहरी निरीक्षकद्धय केशव भट्टराई र दयाराम पौडेलले कुटपीट गरेका हुन्। ब्यारेक बाहिरबाट मादक पदार्थ सेवन गरी मंगलबार साँझ डिएसपीमाथि कुटपीट गरेको सशस्त्र प्रहरी कार्यालय स्रोतले जनाएको छ।
सशस्त्र प्रहरीले ब्यारेकमा मदिरा निषेधित क्षेत्र घोषणा गरेपछि उनीहरु ब्यारेकबाहिर निस्केर मादक पदार्थ सेवन गरी व्यारेक प्रवेश गरेका थिए। ब्यारेक भित्र मादक पदार्थ खाएर आउन पाइदैन भन्ने थाह छैन भनेर डिएसपीले सम्झाउँदा उनीमाथि हातपात भएको सशस्त्र प्रहरी स्रोतले जनाएको छ।
सशस्त्र प्रहरी बल मूख्यालयले उनीहरुलाई नियन्त्रणमा लिएर कारवाहीको थालेको छ। सशस्त्र प्रहरी बलका केन्द्रीय प्रवक्ता प्रवीण श्रेष्ठले डिएसपीमाथि हातपात भएको खबर आएको र हातपात गर्ने प्रहरी अधिकारीलाई कारवाहीको प्रकृया अघि बढाइएको जानकारी दिए।
उनले ब्यारेकबाहिर गएर मादक पदार्थ खाएर डिएसपीमाथि हातपात गरेका कारण उनीहरुलाई कारवाही प्रकृया अघि बढाइएको बताए। हातपात गर्ने प्रहरी निरीक्षक पौडेल भने यसअघि पनि आफ्नै महिला सहकर्मीलाई हातपात गरेको अभियोगमा कारवाहीमा परेका थिए।
