३१ बैशाख, काठमाडौं ।
राष्ट्रियसभा सांसद मृगेन्द्रकुमार सिंहले दौरा सुरवाल र टोपी लगाउनेहरुले भारतसँग राष्ट्रघाती सम्झौताहरु गरेको आरोप लगाएका छन् ।
भारतले नेपाली भूमि मिचेको विषयमा सरकारलाई पूर्व जानकारी रहेको उल्लेख गर्दै उनले यस्तो आरोप लगाएका हुन् । कोशी, गण्डकी, महाकाली र टनकपुर सम्झौताहरु धोती, कुर्था र गम्छा लगाउने मधेशी नागरिकले नभइ दौरा, सुरवाल र टोली लगाउनेले गरेको उनले बताए ।
भारतले नेपाली भूमिमा सडक बनाएको विषयमा प्रधानमन्त्रीले जानकारी थिएन भन्नु ‘म कुटे जस्तो गर्छु तिमि रोएजस्तो गर’ भनेजस्तै भएको बताए । ‘‘भारतका रक्षामन्त्री राजनाथ सिंहले सडक उद्घाटन गरेपछि थाहा पायो नेपाल सरकारले । के रातारात सडक बनेको हो ?पहिलेदेखि नेपाल सरकारलाई थाहा थियो ।
यहाँ कोसी गण्डकी, महाकाली, टनकपुर जति सम्झौता भएका छन् त्यो धोतीकुर्था र गम्छा लगाउनेले गरेका छैनन् । त्यो जम्मै दौरा सुरवाल र टोपी लगाउनेले गरेका हुन् । अहिले पनि त्यो सडक बनिराखेको छ । हाम्रो प्रधानमन्त्रीलाई थाहा थिएन रे । त्यो समयमै कुरा उठाउनु पथ्र्यो, रोक्नु पथ्र्यो ।
नत्र यो त म कुटे जस्तो गर्छु तिमि रोएजस्तो गर्नु भन्ने उखान चरितार्थ भइराखेको छ ।’’ भारतले नेपाली भूमिमाथि आक्रमण गरे मधेशी जनताले गरेको भन्ने निराधार अरोप लाग्ने गरेको उल्ल्ेख गर्दै उनले राष्ट्रिय स्वाभिमानको रक्षाकालागि ज्यानको बाजी लगाउन तयार रहेको बताए ।
‘‘हामी यसमा स्पस्ट छौं नेपालको एक इन्च भूमिको लागि पनि हामी मर्न तयार छौं । हाम्रो दलपनि, सार्वभौंम राष्ट्रको स्वाभिमानी नागरिक हामीपनि हौं । हामीलाई शंकाको दृष्टिले नहेरियोस ।’’ कोभिड — १९ नियन्त्रणका लागि सरकारले गम्भिर कदम चाल्न नसकेको उनले बताए ।
दिनदिनै संक्रमितको संख्या बढिरहेका बेला परीक्षण किटको अभाव रहेको उल्ल्ेख गर्दै उनले सीमा क्षेत्रमा अलपत्र नागरिकहरुलाई व्यवस्थित रुपमा स्वदेश ल्याउन प्रवन्ध मिलाउन पनि आग्रह गरे । सांसद जीवन बुढाले कोरोनाको संक्रमणबाट ढिलो चाँडो मुक्ति पाइए पनि भारतको संक्रमणविरुद्ध लड्न ‘केमिकल उत्पादन’गर्नुपर्ने आवश्यकता औल्याए ।
‘‘कोरोनाभाइरसबाट संक्रमित छौँ । तर हामी छिमेकी भारतबाट पनि संक्रमित छौँ । कोरोनाभाइरस आउने जाने भाइरस हो । यसको औषधि विज्ञले पनि बनाउलान् । संसारभरीका विज्ञहरुको पनि सहयोग प्राप्त गरौँला । तर भारतजस्तो भाइरसको हामीले केमिकल एक्लै उत्पादन र प्रयोग गर्नुपर्ने छ ।
जुन २०४ वर्ष देखि लागेको छ र आजसम्म छोडेको छैन् । यसको उपचार हाम्रो मुल उपचार हो ।’’ सञ्चारमाध्यम समाचार आएपछि काठमाडौंमा रेलिङ भाँच्ने प्रचलननौलो नभएपनि नागरिक र सीमा क्षेत्रको रक्षाकालागि सरकारले गर्नुपर्ने काम केहीगर्न नसकेको बताए ।
सीमा समस्या समाधानका लागि भारतसँग औपचारिक संयन्त्र बनाएर वार्ता गर्न पनि उनले आग्रह गर्नुभयो । सीमा क्षेत्रमा तारबार गरेर मात्रै समस्या समाधान नुहने भन्दै उनले सीमा क्षेत्रमा व्यवस्थापन र भौतिकपूर्वाधार निर्माण गर्नुपर्ने बताए ।
