६ जेष्ठ, काठमाडौं ।
प्रधानमन्त्री केपी शर्मा ओलीले मिलेनियम च्यालेञ्ज कर्पोरेशन (एमसीसी) झस्केलोबाट होइन मुलबाटोबाटै पारित गर्ने बताएका छन् ।
संसदमा नीति तथा कार्यक्रममाथि उठेको प्रश्नको जवाफ दिने क्रममा प्रधानमन्त्री ओलीले एमसीसी प्रक्रिया पूरा गरेरै पारित गर्ने बताएका हुन् । सत्तारुढ नेकपाका सांसद भीम रावलसहितले सरकारले एमसीसी चोरबाटोबाट पारित गर्न खोजेको आरोप लगाएका थिए ।
सो विषयमा जवाफ दिँदै प्रधानमन्त्री ओलीले भने, जलविद्युतको धनी देश भनेर मात्रै हुँदैन, त्यसको व्यापार गर्ने बोलेर मात्रै हुँदैन । त्यसका लागि चाहिने प्रशारण लाइन बनाउनु पर्छ । प्रशारण लाइन एमसीसीले बनाए बनाउँछ । अरुले बनाए पनि बनाउँछ । कसैले नबनाए हामीले बनाउँछौँ ।’
एमसीसी अघिल्लो संयुक्त सरकारले गरेको निर्णय रहेको र अहिलेको सरकारले त्यसलाई कार्यान्वयन मात्रै गर्न खोजेको प्रधानमन्त्री ओलीले बताए । उनले भने, सो सम्झौता कार्यान्वयन गरिन्छ । गरिएन भने सरकारले गरेका सम्झौता बेकार हुन्छन्, कुनै देशले आगामी दिनमा सम्झौता गर्न मान्दैनन् ।’
संसदमा छलफल गरेर यो विषयमा निष्कर्ष निकाल्नु पर्ने उनले उल्लेख गरे । उनले भने, एमसीसी सभामुखको टेबुलमा आइसकेको छ । दलभित्र छलफल गर्न सकिन्छ । तर संसदले निर्णय गर्नुपर्छ ।’
