६ जेठ, काठमाडौं ।
चीनले कालापानीको सीमा विवाद नेपाल र भारतको भएको बताएको छ । मंगलबार नियमित पत्रकार सम्मेलनमा सोधिएको एक प्रश्नमा चिनियाँ विदेश मन्त्रालयका प्रवक्ता झाओ लिजेनले कालापानीको सीमा विवाद नेपाल र भारतको भएको बताउँदै दुई देशले आपसी सम्वादबाट हल गर्ने विश्वास व्यक्त गरे ।
उनले भने, ‘कालापानीको मुद्दा नेपाल र भारतको हो र हामी आशा गर्छौ कि दुई देशले मैत्रिपूर्ण परामर्शबाट विमतीहरु हल गर्नेछन् ।’भारतले लिपुलेकमा नेपाली भूमि अतिक्रमण गरेर चीनको तिब्बतमा रहेको मानसरोवर जाने सडक बनाएको छ । यो सडक दुई देशबीच २०१५ मा भएको सहमतिअनुसार बनेको र चीनसम्म जोडिएकाले नेपालले उत्तरी छिमेकीसँग पनि कुराकानी गर्नुपर्ने माग उठिरहेका बेला यस्तो धारणा सार्वजनिक भएको हो ।
साथै चीनले एकपक्षीय कदम, जसले स्थिति जटिल बनाउन सक्छ, बाट दुबै देश बच्नुपर्नेमा जोड दिएको छ । भारतले नेपाली भूमि अतिक्रमण गरेको भन्दै नेपाल सरकारले विरोध गरेको छ भने सोमबार मात्र लिम्पियाधुरा, कालापानी र लिपुलेकलाई समेटेर नयाँ नक्सा पास गरेको छ ।
