७ जेठ, काठमाडौं ।
भारतमा २५ मेबाट आन्तरिक उडान खुला गर्ने घोषणा गरेको छ । लकडाउनलाई केही खुकुलो बनाईएको भारतमा आउँदो मे २५ बाट आन्तरिक उडान खुला हुने भएको हो ।
भारतीय नागरिक उड्डयन मन्त्री हरदीप सिंह पुरीले २५ मेबाट हवाई सेवा सूचारु गर्ने तयारी गर्न सबै विमानस्थल र वायुसेवा कम्पनीलाई निर्देशन दिएका छन् । मन्त्री पुरीका अनुसार भारतले हवाई उडानका दौरान पालना गर्नुपर्ने निर्देशिका भने सरकारले जारी गर्ने भएको छ । भारत संसारको ठूलो एभिएसन उद्योगमध्ये एक हो ।
भारतमा नागरिक उड्डयन प्राधिकरणले भने यात्रुका लागि सुरक्षा निर्देशका जारी गरिसकेको छ । जसअनुसार अब यात्रुले विमानस्थलमा आएर बोर्डिङ पास लिइरहनु नपर्ने भएको छ । हवाई यात्रुका लागि एक एप्स बनाइएको छ । सोही एप्सबाट बोर्डिङ पास लिन सकिने भएको छ । वेवचेकइन गरी प्राप्त हुने बोर्डिङ पासलाई आफैले प्रिन्ट गरेर सोही पास बोकेर विमानस्थल जानुपर्ने छ । यात्रुले मास्क तथा अन्य सुरक्षात्मक सामग्री अनिवार्य लगाउनु पर्ने भएको छ ।
यात्रुले अब विमानस्थलमा कम्तिमा ४ फिटको दूरी कायम गर्नुपर्छ । त्यस्तै हरेक यात्रुले ३५० एमएल क्षमताको स्यानिटाइजर बोटलसमेत साथमा राख्नु पर्ने भएको छ । भारतमा ३१ मेसम्म लकडाउन बढाइए पनि शर्तसहित आन्तरिक उडान सुरु हुने भएको हो । राजधानी नयाँ दिल्लीसहित कतिपय शहरमा शर्तसहित लकडाउन खुकुलो भएको छ । यहाँ सार्वजनिक यातायात समेत संचालनमा आइसकेको छ ।
