१२ जेठ, विराटनगर ।
आपसी भातृत्व, सुख, शान्ति र समृद्धिको कामना गर्दै इस्लाम धर्मावलम्बीले इद उल फित्र मनाइरहेका छन् । एक महिनासम्मको कठोर उपबास र श्रद्धापूर्वक मनाइएको रमजान अर्थात रोजाको समाप्तिसँगै आइतबार साँझ देखिएको चन्द्रमाको दर्शनपछि सोमबार ईद मनाईएको हो । लकडाउनका कारण सबैक्षेत्र प्रभावित भएको सन्दर्भमा इस्लाम धर्मालम्बीको महान पर्व ईदसमेत प्रभावित भएको छ । यस वर्ष श्रद्धालुहरुले घरआँगनमै नमाज पढेर ईद मनाइरहेका छन् ।
रमजान महिना सकिएको दिन इस्लाम धर्मावलम्बीहरुले आज ईद–उल–फित्र मनाएका छन् । अरबी पात्रो हिजरी सम्बत अनुसार दशौं महिनाको पहिलो दिन अर्थात रमजान महिना सकिएको दिन आज मुस्लिम समुदायले विशेष नमाज आदा गरी ईद–उल–फित्र मनाउने गर्दछन् ।
अरबी पात्रो अनुसार नवौं महिनाको अन्तिम दिन चन्द्रमा देखिएपछि भोलीपल्ट ईद–उल–फित्र मनाउने गरिन्छ । ईदमा विशेष नमाज आदा गरिसकेपछि आफुभन्दा ठूलाबडाबाट आर्शिर्वाद लिने र आफुभन्दा सानालाई आर्शिवाद दिने गरिन्छ । ईदका दिन इस्लाम धर्मावलम्बीहरुले मस्जिद तथा ईदगाहमा भेला भई सामूहिक रुपमा नमाज आदा गर्ने परम्परा रहेको छ ।
यसवर्ष भने कोरोना भाइरस (कोभिड–१९) रोकथामका लागि लकडाउन जारी भएपछि मस्जिदमा सामूहिक रुपमा नमाज आदा नगर्न मुस्लिम आयोगले आग्रह गरेको थियो । मुस्लिम आयोगले समेत देशभरिका इस्लाम धर्मावलम्बीलाई लकडाउनको पालना गर्दै घरघरमै सुरक्षित रुपमा इद मनाउन आग्रह गरेअनुसार सामाजिक दुरी कायम गर्दै घरघरै इदको नमाज पढिएको हो ।
त्यसैले ईदका दिन आज सवै मस्जिद सुनसान देखिए । मस्जिदमा रहेका धर्मगुरु र कर्मचारीले मात्र प्रार्थना गरेका छन् । यस दिन रोजापर्व बस्ने रोजेदारहरुले ३० दिनपछि पहिलोपटक दिनको खाना खाने गर्छन् । इदको अवसरमा ठूला–साना सबैले नयाँनयाँ लुगा लगाएर एकअर्कालाई शुभकामना आदानप्रदान गर्ने चलन रही आएको छ । ईदको अवसरमा गरिब र असाहायहरुलाई भिक्षा दान र सहयोग गर्ने चलन छ । सरकारले ईदको अवसरमा आज देशभर सार्वजनिक विदा दिएको थियो ।
