२१ जेठ, जाजरकोट ।
रुकुम पश्चिमको चौरजहारी नगरपालिका ८ सोतीगाउँमा गत शनिबार भएको घटनामा बेपत्ता भएका भेरी नगरपालिका-११ मटेलाका १९ वर्षीय गोविन्द शाहीको शव १० दिनपछि फेला परेको छ । उनको शव मंगलबार भेरी नगरपालिका-१२, खोताखोलास्थित भेरी नदीमा फेला परेको प्रहरीले जनाएको छ ।
बेपत्ताको शव घटनास्थलभन्दा करिब २० किलोमिटर टाढा फेला परेको जिल्ला प्रहरी प्रमुख डीएसपी किशोरकुमार श्रेष्ठले बताए । स्थानीय छवि पन्तले मुख र टाउकोमा कपडाले बाँधेको, आँखा फुटेको तथा हात र नाक भाँचिएको अवस्थामा शव फेला परेको बताए ।
जाजरकोटबाट साथी नवराज विककी प्रेमिका भगाउन रुकुम पश्चिमको चौरजहारी पुगेका उनीसहित १९ जना सोतीगाउँका स्थानीयको आक्रमणमा परेका थिए । घटनामा यसअघि ५ जनाको मृत्यु भइसकेको छ । स्थानीयले उनीहरुको हत्या गरेर नदीमा फालिएको दाबी गरेका छन् ।
डिएसपी श्रेष्ठका अनुसार शाहीको शव पोस्टमार्टमका लागि जाजरकोट अस्पताल लगिएको छ । पोस्टमार्टम रिपोर्टपछि उनको मृत्युको कारण खुल्ने उनको भनाइ छ ।
घटनामा संलग्न भएको भन्दै प्रहरीले ८ नम्बर वडाध्यक्ष डम्मरबहादुर मल्लसहित १८ जनालाई पक्राउ गरी अनुसन्धान थालेको छ । १९ वर्षीय शाही भेरी नगरपालिका-११, मटेलाका इन्द्रबहादुर र भीमा कुमारीका कान्छा छोरा हुन् । उनी शीतल मावि, चौरजहारीबाट यस वर्षको एसईई परीक्षामा सहभागी हुँदै थिए ।
