३२ जेष्ठ, काठमाडौं ।
राष्ट्रियसभा सदस्यहरुले नेपाली भूमि फिर्ता लिनका लागि बलियो राष्ट्रिय एकताको आवश्यकता औल्याएका छन् ।
आइतबार प्रतिनिधिसभाबाट सन्देशसहित प्राप्त नेपालको संविधान दोस्रो संशोधन विधेयक २०७७ माथिको विचार गरियोस भन्ने प्रस्तावको सैद्धान्तिक छलफलमा सहभागि सांसदहरुले भूमि फिर्ता गर्न बलियो राष्ट्रिय एकताको आवश्यकता रहेको बताएका हुन् ।
सांसद रामनारायण विडारीले भूमि फिर्ताका लागि पुरा गर्नुपर्ने नेपाल र नेपालीको कर्तव्य भएको बताए । अहिलेको अवशर प्राप्त गर्नका लागि धेरै आन्दोलन गर्नुपरेको स्मरण गर्दै उनले भने, ‘‘लाठी खाइयो, थुनामा परियो, कालापानी क्षेत्र हाम्रो हो भन्दा गोदाइ खाइयो । त्यस्तो हुँदाहुँदै आज हामी यहाँ आइपुग्यौँ ।
यति काम गर्नका लागि हामीलाई गणतन्त्र चाहिने अवस्था परेको रहेछ । गणतन्त्र नआइ यो काम भएन् । जति धाक लाएपनि, जति लिपपोत गरेपनि, जति छोपेपनि गणतन्त्र नआइकन लोकतन्त्र नआइकन हामीले यो काम गर्न सकेनौँ ।’’
अब भारतीय सेनालाई नेपाली भूमिबाट हटाउने, भूमिफिर्ता गराउने र त्यहाँ निर्माण भएको बाटो नेपालको स्वीकृति बिना चल्न नदिने कर्तव्य रहेको उनले बताए । भारतबाट पैसा बुझ्नेहरु भूमिफिर्ता ल्याए ओलीको बुट पालिस गर्ने कुरा गरेको भन्दै विडारीले भने ‘‘केही केहीले भूमिफिर्ता लियो भने ओलीको बुट पोलिस गर्छु भने, अहिले मोदीको बुट पोलिस गर्दैछन्, फिर्ता आयो भने ओलीको बुट पोलिस गर्छन् ।
म प्रधानमन्त्रीलाई आग्रह गर्छु भूमिफिर्ता आएपछि त्यस्ता मान्छेलाई बुट पोलिस भन्दापनि सीमानामा पाले बनाएर राख्नुपर्छ ।’’ सांसद बेदुराम भूसालले पञ्चायतकालमा अतिक्रमणमा परेको भूमिफिर्ता ल्याएर त्यसर्लाइ संवैधानिक मान्यता दिन विधेयक आएको बताए ।
विगतबाट नै नेपाली भूमि गुमेको कुरा उठेको उल्लेख गर्दै उनले पटक पटक भारत सरकारले गरेका निर्णहरुको विरोध भएपनि भारतले त्यसको सुनुवाई नगरेको बताए । मातृभूमिको रक्षाका लागि सरकारले गरेको निर्णयको स्वागत गर्दै उनले प्रतिनिधिसभामा भएको एकताका लागि उच्च सम्मान व्यक्त गर्छु भने ।
राष्ट्रियसभाबाट विधेयक पारित गराउनु भूमिको प्रारम्भ विन्दु भएको उनले बताए । नेपालको भूमि नेपालको नियन्त्रणमा लिन सबै राजनीतिकदल र देश एकतावद्ध हुनुपर्ने उनले बताए । सांसद जगप्रसाद शर्माले निशान चिह्नबाट नेपालको चुच्चे नक्सा कसरी हट्यो भन्ने कुराको खोजी हुनुपर्ने बताए ।
गम्भिर विषय निशान चिह्नबाट कसरी हट्यो भन्ने आश्चार्यको विषय बनेकाले पुराना दस्तावेजहरुको आधारमा यसको खोजी हुनुपर्ने उनले बताए । प्रतिनिधिसभाबाट विधेयक पारित भएपछि भारतीयहरुले त्यसलाई मान्यता नदिने भनेर दिएको प्रतिक्रिया स्वभाविक भएको उल्लेख गर्दै उनले नक्सामात्रै नभएर भुमिफिर्ताका लागि बलियो राष्ट्रिय एकता कायम गर्नुपर्ने बताए ।
सांसद ठगेन्द्र प्रकाश पुरीले विधेयकको सम्बन्ध राष्ट्रियतासँग जोडिएको बताए । राष्ट्रियता देशको माटो र जनताको आत्मा भएकाले यसमाथिको आक्रमण सैह्य नहुने उनले बताए । सांसद जितेन्द्र नारायण देवले नेपालभारत सीमा विवाद शान्तिपूर्ण वार्ताबाट समाधान गर्ने बाटोतिर जानुपर्नेमा त्यसो हुन नसकेको बताए ।
श्रीलंका र बंगलादेश सीमाविवाद वार्ताबाट नै सम्भव भएको उदाहरण दिँदै उनले त्यही बाटोतर्फ जानुपर्नेमा त्यसो हुन नसकेको बताए । सरकारले त्यही तरिकाले जानुपर्ने भएपनि गएन तर नेपालको भूभाग नेपालीहरुले लिएर छाड्नुपर्ने उनले बताए ।
