१२ असोज , काठमाण्डौ ।
नेपाली महिला क्रिकेटमा उत्कृष्ट प्रदर्शन गर्दै राष्ट्रिय टोलीमा योगदान पु¥याउँदै आएकी क्रिकेटर मनीषा उपाध्यायलाई ‘स्व.रमा देवी स्मृति क्रिकेट कप’को तर्फबाट ६० हजार रुपैयाँ बराबरको क्रिकेट सामग्री प्रदान गर्दै सम्मान गरिएको छ।
नेपाली क्रिकेटमा मनीषाले पु¥याएको योगदान, निरन्तर मेहनत र उत्कृष्ट प्रदर्शनको सम्मानस्वरूप उक्त क्रिकेट किट प्रदान गरिएको हो। क्रिकेटप्रतिको उनको समर्पण र आगामी दिनमा अझ उच्च सफलता हासिल गर्ने यात्रालाई प्रोत्साहन गर्ने उद्देश्यले यो सम्मान गरिएको आयोजकले जनाएको छ।
मनीषा उपाध्यायलाई स्व.रमा देवी स्मृति क्रिकेट कपका प्रतियोगिता निर्देशक राज क्षेत्रीले क्रिकेट सामग्री हस्तान्तरण गर्दै सम्मान गरेका हुन्। क्षेत्रीले नेपाली क्रिकेटमा उत्कृष्ट प्रदर्शन गर्ने खेलाडीलाई सम्मान र प्रोत्साहन गर्नु आफ्नो जिम्मेवारी मात्र नभई नेपाली क्रिकेटको विकासमा योगदान गर्ने एउटा महत्वपूर्ण प्रयास भएको बताए।
प्रतियोगिता निर्देशक राज क्षेत्री नेपाली क्रिकेटको विकासमा स्थानीय स्तरबाट प्रतिभा पहिचान, प्रोत्साहन र खेलाडीलाई आवश्यक सहयोग उपलब्ध गराउने अभियानमा सक्रिय रहँदै आएका छन्। खेलकुदलाई केवल प्रतियोगितामा सीमित नराखी खेलाडीको संघर्ष र योगदानलाई सम्मान गर्ने संस्कारको विकास गर्नुपर्ने उनको सोच रहेको छ।
‘स्व.रमा देवी स्मृति क्रिकेट कप’मार्फत पनि उनले क्रिकेट र खेलाडीबीचको सम्बन्धलाई अझ बलियो बनाउने प्रयास गरेका छन्। यस सम्मान कार्यक्रमको आयोजनालाई सफल बनाउन अन्तर्राष्ट्रिय क्रिकेट अम्पायर तथा प्रतियोगिताका प्राविधिक निर्देशक रविन्द्र गुप्ताको विशेष पहल र महत्वपूर्ण योगदान रहेको छ।
प्रतियोगिताको अवधारणा, व्यवस्थापन तथा आयोजनालाई मूर्तरूप दिन गुप्ताले निरन्तर सहयोग र समन्वय गर्दै आएका छन्। अन्तर्राष्ट्रिय स्तरमा अम्पायरका रूपमा आफ्नो अनुभव हासिल गरेका रविन्द्र गुप्ताले खेलाडीलाई प्रोत्साहन गर्नु नै नेपाली क्रिकेटको भविष्यमा लगानी गर्नु भएको बताए।
गुप्ताले भने, “खेलाडीले मैदानमा गरेको मेहनत र संघर्षलाई सम्मान गर्न सकियो भने त्यसले उनीहरूलाई अझ राम्रो गर्न ऊर्जा दिन्छ। मनीषाजस्ता प्रतिभाशाली खेलाडीलाई सम्मान गर्नु उहाँको योगदानको कदर मात्र होइन, आगामी पुस्ताका खेलाडीलाई पनि सपना देख्न र त्यसका लागि मेहनत गर्न प्रेरित गर्ने माध्यम हो। नेपाली क्रिकेटलाई अगाडि बढाउन हामी सबैले आफ्नो ठाउँबाट सकेको योगदान गर्नुपर्छ।”
यसैबीच, मनीषा उपाध्याय नेपाली महिला क्रिकेटमा आफ्नो मेहनत, अनुशासन र निरन्तर प्रदर्शनका माध्यमबाट नयाँ पुस्ताका खेलाडीका लागि प्रेरणाको स्रोत बन्दै आएकी छन्। राष्ट्रिय टोलीका लागि मैदानमा गरेको उनको योगदानले नेपाली महिला क्रिकेटको सम्भावना र क्षमतालाई थप उजागर गरेको छ।
उनको खेलयात्रामा गरिएको यो सम्मानले आगामी दिनमा अझ उत्कृष्ट प्रदर्शनका लागि हौसला प्रदान गर्ने विश्वास आयोजकको छ। मनीषाले ६० हजार रुपैयाँ बराबरको क्रिकेट किट प्राप्त गर्दा आफू निकै खुसी भएको उल्लेख गर्दै यो सम्मानलाई आफ्नो खेलयात्राका लागि विशेष क्षणका रूपमा लिएको बताइन्।
उनले आफू अत्यन्तै उत्साहित र खुसी भएको प्रतिक्रिया दिइन्। नेपाली महिला क्रिकेटका लागि आगामी दिनमा अझ मेहनत गर्ने प्रेरणा मिलेको बताउँदै मनीषाले आयोजक प्रतियोगिता निर्देशक राज क्षेत्रीसहित सम्पूर्ण आयोजक टिमलाई धन्यवाद दिइन्।
उनले खेलाडीको प्रदर्शनको सम्मान र प्रोत्साहनले मैदानमा अझ राम्रो गर्न ऊर्जा प्रदान गर्ने उल्लेख गरिन्। स्व.रमा देवी स्मृति क्रिकेट कप आगामी अक्टोबर १३, २०२६ मा अर्घाखाँचीमा आयोजना हुँदैछ। प्रतियोगिताले स्थानीय क्रिकेटको प्रवद्र्धनसँगै प्रतिभाशाली खेलाडीलाई प्रतिस्पर्धात्मक अवसर प्रदान गर्ने उद्देश्य राखेको छ।
