२ असार, पोखरा ।
गण्डकी प्रदेशमा मंगलबार १८ कोरोना संक्रमित थपिएका छन् ।
सबैभन्दा बढी गोरखामा १०, स्याङ्जामा ४, पूर्वी नवलपरासीमा २, कास्की र बागलुङमा १र१ जना संक्रमित थपिएको प्रदेश स्वास्थ्य निर्देशनालयले जनाएको छ । प्रदेश स्वास्थ्य निर्देशक एवं कोरोना नियन्त्रण तथा रोकथाम कार्यक्रमका प्रवक्ता डा. विनोदविन्दु शर्माका अनुसार संक्रमितमा १ महिला र बाँकी सबै पुरुष छन् ।
उनीहरू सबै भारतबाट फर्किएर सम्बन्धित स्थानीय तहको क्वारेन्टाइनमा बस्दै आएका थिए । सबैलाई सम्बन्धित जिल्लाका आइसोलेसन कक्षमा लैजाने तयारी भइरहेको उनले बताए । यससँग प्रदेशमा संक्रमितको संख्या २ सय २३ पुगेको छ । यहाँका मनाङ र मुस्ताङबाहेक अरू ९ जिल्लामा संक्रमित भेटिएका छन् ।
सबैभन्दा बढी स्याङ्जामा ६४ पुगेका छन् । संक्रमितमध्ये २० जना निको भएर घर फर्किएका छन् । स्याङ्जाका एक जनाको भने मृत्यु भएको छ ।
