३ असार, नयाँ दिल्ली ।
भारतीय प्रधानमन्त्री नरेन्द्र मोदीले सहिदहरुको बलिदान खेर जान नदिने बताएका छन् । लद्दाखको गलवान उपत्यकामा सोमबार राति बीस जना भारतीय सैनिकको ज्यान जाने गरी भएको हिंसात्मक झडपप्रति प्रतिक्रिया दिँदै मोदीले यस्तो बताएका हुन् । उनले भारत शान्तिको पक्षमा रहेकातर, उक्साएको खन्डमा उचित जवाफ दिन सक्षम रहेको पनि बताए ।
बुधबार कोरोना भाइरसका विषयमा भारतका मुख्यमन्त्रीहरुसितको बैठकको सुरुमा उनले लद्दाखमा भारत-चीन सीमा विवादका विषयमा बोलेका हुन् । उनले सीमामा मारिएका आफ्ना सैनिकको शहादत व्यर्थ नजाने बताए । उनले भने- ‘देशको सेवाका लागि सैनिकहरुको महान् बलिदानका लागि नमन गर्छु । आज पूरा देश तपाईंहरुसँग छ र पूरै देशको भावना तपाईंहरुसँग छ । सहिदको बलिदान खेर जान दिने छैनौं । म पूरै देशलाई भरोसा दिलाउन चाहन्छु, हाम्रा जवानहरुको बलिदान खेर जान छैन । ’
भारतीय र चिनियाँ सैनिकहरुबीच भएको झडपमा २० जना भारतीय सैनिकहरुको मृत्यु भएको थियो । भारत र चीनबीच विगत एक महिनादेखि कायम रहेको तनाव बढ्दै गएर सोमबार साँझ हिंसात्मक झडपको रुप लिएको थियो । प्रधानमन्त्री मोदीले भारतले कहिले-कसैलाई नउक्साएको भन्दै आफूहरु आफ्नो देशको अखन्डता र सम्प्रभुताका विषयमा सम्झौता पनि नगर्ने स्पस्ट पारे । उनले आफ्नो स्वाभिमान र एक इन्च जमिनको पनि रक्षा गर्ने उल्लेख गरे ।
त्यसैगरी भारतले छिमेकीहरुसँग सँधै नै समझदारीपूणर् र शान्तिपूणर् तरिकाले मिलेर काम गर्दै आएको र छिमेकीको विकास र शान्तिको कामना गर्ने गरेको समेत मोदीले उल्लेख गरेका छन् । साथै उनले छिमेकबीच मतभेद भए पनि त्यो विवादमा परिणत नहोस् भन्ने भारतको चाहनासमेत रहेको बताएका छन् । उनले भने- ‘भारतले कसैलाई उक्साउने गरेको छैन, तर देशको अखण्डता र सम्प्रुभतामा सम्झौता भने कहिल्यै गर्ने छैन । जहिले पनि आफ्नो देशको अखण्डता र संप्रभुताको रक्षा गर्नुपर्ने अवस्था आएको छ भारतले सँधै आफ्नो शक्ति प्रदर्शन गर्दै क्षमता सावित गरेको छ । यस विषयमा कसैलाई थोरै पनि भ्रम र सन्देह नहोस् ’
त्यसक्रममा उनले लद्दाखस्थित भारत-चीन सीमाको गलवान उपत्यकामा मारिएका आफ्ना सैनिकप्रति श्रद्धाञ्जलि व्यक्त गरेका थिए । दुई मिनेटको मौन धारण समेत गरिएको थियो ।
यसैबीच, बुधबार अपराह्न भारतका विदेशमन्त्री एस जयशंकरले चीनका विदेशमन्त्री वाङ यीसित सीमामा भएको तनावका विषयमा टेलिफोनमा कुराकानी गरेका छन् ।
घटनाबारे चीनले गलवान उपत्यकामा भएको घटनामा आफू जिम्मेवार नभएको र भारतकै कारण झडप भएको प्रतिक्रिया दिएको थियो ।
