२१ असार, काठमाडौ । विश्व स्वास्थ्य सङ्गठन (डब्ल्यूएचओ)ले कोरोना सङ्क्रमित व्यक्तिमा हाइड्रोक्सिक्लोरोक्विन र लोपिनाभिर रिटोनाभिर औषधिको प्रयोग बन्द गर्न लागिएको जनाएको छ ।
मलेरियाको उपचारमा प्रयोग आउने हाइड्रोक्सिक्लोरोक्विन र एचआईभी सङ्क्रमितलाई दिइने लोपिनएभिर–रिटोनाभिर औषधिबाट कोरोना सङ्क्रमितको मृत्युदर नरोकिएको कारण यस्तो निर्णय लिएको विश्व स्वास्थ्य सङ्गठनले बताएको बीबीसीले जनाएको छ ।
कोरोना सङ्क्रमितको उपचारको लागि विभिन्न खोप र औषधि परीक्षणमा यो औषधिलाई एक आशाको रुपमा हेरिएको थियो तर त्यो सफल हुन सकेन ।
यसैबीच विश्व स्वास्थ्य सङ्गठनले विश्वभरमा पहिलो पटक एकैदिनमा दुई लाखभन्दा धेरैमा कोरोना सङ्क्रमण पुष्टि भएको जनाएको छ ।
शुक्रबार विश्वभर दुई लाख १२ हजार तीन सय २६ जनामा सङ्क्रमण पुष्टि भएकोमा अमेरिकामा मात्रै ५३ हजार दुई सय १३ जनामा सङ्क्रमण पुष्टि भएको हो ।
विश्वका विभिन्न देशमा विश्व स्वास्थ्य सङ्गठनको अगुवाइमा यी औषधिले कोरोना सङ्क्रमितमा परेको असरबारे जाँच भइरहेको थियो ।
एक अन्तर्राष्ट्रिय कमिटीको सिफारिसमा विश्व स्वास्थ्य सङ्गठनले यस्तो निर्णय लिएको सङ्गठनको स्वास्थ्य एजेन्सीले बताएको छ ।
यद्यपि डब्ल्यूएचओले अस्पतालमा भर्ना नभएका बिरामी र रोगनिरोधकको रुपमा उनीहरुमाथि यसको प्रयोगसँग जोडिएको अध्ययनमा यो निर्णयको असर नपर्ने जनाएको छ ।
