२६ असार, काठमाडौं ।
फेसबुकसहितका सामाजिक सञ्जाल तथा अनलाइन पोर्टलहरुमा आत्महत्या गरिएको भिडियो सेयर गर्नेलाई प्रहरीले कारबाही गर्ने भएको छ । प्रहरी प्रधान कार्यालय साइबर ब्युरोले शुक्रबार विज्ञप्ति जारी त्यस्तो कार्य गर्नेलाई दण्डित गरिने जनाएको हो ।
फेसबुकसहितका सामाजिक सञ्जाल तथा अनलाइन पोर्टलहरुमा आत्महत्याका भिडियोहरू अपलोड गर्ने क्रम बढेपछि प्रहरीले त्यस्तो गतिविधिमा रोक लगाउन लागेको हो ।
जारी विज्ञप्तिमा भनिएको छ- ‘यस्ता किसिमका कार्यहरु सार्वजनिक नैतिकता एवं शिष्टाचारविरुद्ध हुने, समाजमा घृणा वा द्वेष फैलाउने, साथै विभिन्न किसिमका मानसिक पीडामा रहेका व्यक्तिहरुलाई आत्महत्या गर्नका लागि दुरुत्साहन पुर्याउने हुँदा नेपालको प्रचलित कानुन बमोजिम दण्डनीय भएकोले त्यस्ता कार्यहरु कसैले पनि नगर्न नगराउन हुन अनुरोध गरिएको छ ।’
साथै आत्महत्या गर्ने उद्देश्यले सामाजिक सञ्जालमा लाईभ भिडियो सेयर गर्दै गरेको थाहा पाए तत्काल प्रहरीलाई खबर गर्न र व्यक्तिको उद्धारमा खटिन प्रहरीले आग्रह गरेको छ ।
