४ साउन, कैलाली ।
बुबाबाटै पटकपटक बलात्कार भएर तीन दिनअघि घर छोडेर हिँडेका कैलालीका दुई बालिका अलपत्र परेपछि सुरक्षित आवास गृहमा राखिएको छ।
गएको एक वर्षदेखि बुबाले नै बलात्कार गर्ने गरेको बताइएको छ। १४ र १६ वर्षीया बालिकालाई घरमा ताल्चा लगाएर थुनी बुबा फरार भएका थिए। आमा केहि वर्षदेखि वैदेशिक रोजगारीमा छिन्। इलाका प्रहरी कार्यालय सुखडमा शनिवार उजुरी दिए पनि दर्ता गर्न नमानेको पीडितको आरोप छ।
दुवै नाबालिक भएकाले उजुरी दर्ता गर्न संरक्षक चाहिने र कोही पनि व्यक्ति नभेटिएकाले दर्ता हुन नसकेको ईलाका प्रहरी कार्यालय सुखडका प्रमुख प्रहरी निरीक्षक हरिशरण भट्टले बताए। पीडित बालिकाहरूलाई जिम्मा लिएर सुरक्षित आवास गृहमा राखेको ओरेक कैलालीकी कार्यक्रम संयोजक गीता चौधरीले जानकारी दिइन्।
घटनाबारे हजुरआमालाई जानकारी गराए पनि उल्टै घरबाट निकालेको आरोप बालिकाहरूको छ। इलाका प्रहरी कार्यालयसम्म पुगेको बिषय प्रहरीले संरक्षक नभएको भन्दै जाहेरी नलिएपछि ओरेक कैलालीले आइतबार जिल्ला प्रहरी कार्यालय कैलालीमा जाहेरी दर्ता गर्ने जनाएको छ।
