१४ साउन, विराटनगर ।
विराटनगरमा भोलि बिहीबारदेखि सर्वसाधारणलाई हिंडडुल गर्न र यातायातका साधन सञ्चालनमा कडाइ गरिने भएको छ । कोभिड १९ क्राइसिस म्यानेजमेन्ट समिति मोरङको बुधवार बसेको बैठकले आवागमनमा कडाइ गर्ने र सडकमा भिडभाड गर्न नदिइने निर्णय गरेको हो ।
मास्कको प्रयोगलाई अनिवार्य गर्ने र नगरेको खण्डमा जरिवाना तिराउने पनि बैठकले निर्णय गरेको छ । अटो तथा सिटी रिक्सामा एकलाइनमा एकजनामात्रै यात्रु बोक्न पाउने, निजी प्लेटका सवारी साधनले सिटमा दुरी कायम गर्नुपर्ने, नगरे जरिवाना गर्ने निर्णय भएको छ । लकडाउनको पूर्वतयारीका लागि पहिलो चरणमा स्वास्थ्य, सुरक्षा र यातायात मापदण्डलाई कडाइ गर्ने निर्णय भएको हो । विराटनगरमा मंगलवार एकै दिन १६ जनामा कोरोनाको संक्रमण पोजेटिभ भेटिएपछि लकडाउन गर्नुपर्ने दवाव बढेको छ ।
जिल्ला प्रशासन कार्यालय मोरङको पहलमा सोही कार्यालयको समीक्षालयमा आयोजित बैठकमा लकडाउन गर्ने कि नगर्ने भन्ने विषयमा छलफल भएको थियो बैठकमा सहभागी अधिकांशले लकडाउन गर्नुपर्ने सुझाव दिएका थिए । तर तुरुन्तै लकडाउन गर्नु उपयुक्त नहुने निश्कर्ष निकाल्दै पहिलो चरणमा अन्य क्षेत्रमा कडाइ गर्ने निर्णय भएको हो ।
