१८ साउन, धनुषा ।
धनुषामा कोरोना जितेका एक युवकले समाज र परिवारको घृणा सहन नसकेर आत्महत्या गरेका छन् । मिथिला विहारी नगरपालिका– २ का ३५ वर्षीय विशेश्वर यादवले शुक्रबार घर नजिकैको विद्यालयमा बनाएको क्वारेन्टाइनको पछाडि आँपको रूखमा झुण्डिएर आत्महत्या गरेका हुन् ।
९ दिन अगाडि उनी नगराइन नगरपालिकास्थित गंगुली आइसोलेसनबाट कोरोना जितेर घर फर्केका थिए । तर, घरमा बस्न नदिएको र समाजले घृणा गरेपछि आत्महत्या गर्न बाध्य बनेको स्थानीय एक युवकले बताए ।
असार १६ गते दिल्लीबाट फर्केका उनको असार २६ मा स्वाब संकलन गरिएको थियो । साउन १ गते आएको रिपोर्टमा कोरोना पोजेटिभ देखिएपछि १० दिन क्वारेन्टिमा बसेका उनलाई लक्षण नदेखिएपछि साउन १०मा घर पठाईएको थियो ।
तर, परीक्षण नगरी घर पठाईएका कारण उनलाई परिवारले घरभित्र नपस्न आग्रह गरकोे, समाजले घृणा गरेको एक स्थानिय बताउँछन् । कोरोना संक्रमित विशेश्वरलाई घर पठाउनु अगाडि पुनः पीसीआर टेष्ट नगरेकै कारण परिवार र समाज घृष्णा, दुव्यर्वहार गरेको देखिन्छ । र, त्यही सहन नसकेर उनले आत्महत्याको बाटो रोजे ।
तर उनलाइ ‘स्वास्थ्य मन्त्रालय र विश्व स्वास्थ्य संगठनको मापदण्डअनुसार नै उनलाई घर पठाइएको गांगुली आइसोलेसन प्रमुख सन्तोष ठाकुर दाबी गर्छन् ।
