योगेन्द्र योगी
२२ साउन, दोहा ।
कोरोना भाइरस लगायत अन्य विभिन्न कारणले कतारबाट स्वदेश फर्किन नसकेका नेपाली नागरिकहरू मध्ये नेपाली दूतावासको समन्वय र नेपाल सरकारको सहजीकरणमा कतारबाट १५३ जना नेपाली स्वदेश फर्किए छन् ।
दोहाबाट काठमाडौँको लागि उडेको हिमालय एयरलाइन्सको ९५६३२ उडानमा ८ महिलासहित १५३ जना नेपाली रहेको कतारस्थित नेपाली दूतावासका द्वितीय सचीव भुवन प्रसाद भट्टले जानकारी दिएका छन् ।
स्वदेश फर्कन लागेकाहरुको यात्रा सहजिकरणका तथा बिदाईका लागि नेपाली दूतावासका द्वितीय सचिव भुवन प्रसाद भट्ट लगायत नेपाली समुदायका प्रतिनिधिहरुको हमाद अन्तर्राष्ट्रिय विमानस्थल पुगेका थिए । यसैगरी अर्को उडान अगष्ट ८ र ९ मा हिमालय तथा अगष्ट ९ र १० मा नेपाल एयरलाइन्सले गर्ने तय भएको दूतावासले जनाएको छ ।
दूतावासले यस अघिका उडानका लागि प्रकाशित गरेको प्राथमिकता सूचिमा नाम भएका तर विभिन्न कारणले टिकट काट्न छुटेको व्यक्तिहरुले पनि यी उडानहरूमा टिकट काटेर यात्रा गर्न सक्नेछन् । यी उडानका लागि हवाई टिकट उपलब्ध हुन नसकेमा आगामी उडानहरुमा टिकट काट्न सकिने दूतावासले जनाएको छ ।
दूतावासका अनुसार संलग्न सूचीमा कतार सरकारको गृह मन्त्रालयबाट स्वीकृति प्राप्त भैसकेका र स्वीकृतिका लागि प्रक्रियामा रहेका नामहरू छ्ट्याईएको छ । स्वीकृति प्राप्त भैसकेका व्यक्तिको हकमा स्वीकृति प्राप्त भएपछि मात्र यात्रा गर्न सकिने छ ।
