२६ साउन, एजेन्सी ।
भारतको राजस्थानमा पाकिस्तानबाट गएका एकै परिवारका ११ जनाको शव भेटिएको छ ।
जोधपुर जिल्लाको देचू थाना क्षेत्रको खेतमा उनीहरुको शव भेटिएको भारतीय सञ्चार माध्यमले जनाएका छन् । पाकिस्तानबाट गएकामध्ये १ जना जिवितै भेटिएका छन् ।
घटनास्थलबाट किटनाशक औषधि भेटिएकोले ज्यान जानुको कारण पारिवारिक झगडा हुन सक्ने अनुमान गरिएको बीबीसी हिन्दीले जनाएको छ । ११ जनाको शव खेतमा भेटिएपछि प्रहरीले अनुसन्धान थालेको छ ।
झण्डै ८ वर्ष पहिले पाकिस्तानको सिन्ध प्रान्तबाट आएका उनीहरु आदिवासी भील समुदायका हुन् । परिवारले खेत भाडामा लिएर खेती गर्दै आएका थिए । ज्यान जानुको कारण थाहा पाउन फरेन्सिक एक्सपर्टको सहयोग लिइएको प्रहरीले जनाएको छ ।
पाकिस्तानबाट शरणको खोजी गर्दै आएको यो परिवारले भारतमा नागरिकताका लागि अपिल गर्दै आएको स्थानीय अगुवाले बताएका खबरमा उल्लेख छ ।
