२९ साउन, चितवन । चितवनको पुरानो मेडिकल कलेजमा नक्कली भान्जा बनाई अवैध मिर्गौला प्रत्यारोपण गरेको आरोपमा पक्राउ परेका १३ जना धरौटीमा रिहा भएका छन्।
बुधबार जिल्ला अदालत ललितपुरले उनीहरुलाई २० हजार देखि ४ लाख रुपैयाँसम्म धरौटी माग गरेको थियो। महानगरीय प्रहरी परिसरका एसपी तुलबहादुर कार्कीका अनुसार उनीहरू धरौटी बुझाएर छुटेका छन् ।
मिर्गौला दिने नक्कली भान्जा सन्तोष राई २० हजार रुपैयाँ धरौटीमा छुटेका छन् । चितवन जिप्रकाका प्रशासकीय अधिकृत रामचन्द्र ढकाल, कानुनी सल्लाहकार रमेश काफ्ले, अस्पतालका प्रमुख सञ्चालक अधिकृत डा. सुप्रभात श्रेष्ठ तथा चिकित्सक डा. बालकृष्ण कालाखेती र मानवअंग प्रत्यारोपण केन्द्रका डा. राकेशकुमार बर्मा ५० हजार धरौटीमा छुटेका छन्।
ललितपुर महानगरपालिका ३ का वडाध्यक्ष श्रीगोपाल महर्जन, ललितपुर जिल्ला प्रशासनका खरिदार नवराज केसी र कार्यालय सहायक रामकुमार केसी ५० हजार रुपैयाँका दरले धरौटी बुझाएर छुटेका छन्।
मिर्गौला लिने व्यक्तिकी बहिनी जमुना बतास, मध्यस्थकर्ता रेश्मा राई, सई योगेन्द्र थपलिया र भीमप्रसाद खनाल ४ लाख धरौटी बुझाएर छुटेका हुन्।
एसपी कार्कीका अनुसार यस घटनामा प्रहरीले १९ जनालाई प्रतिवादी बनाएको थियो। त्यसमध्ये पाँच जना अझै फरार छन्।
अस्पतालले मिर्गौला दिने र लिनेलाई २०७६ साल जेठ २० गते भर्ना गराएको थियो। तर मिर्गौला प्रत्यारोपण समितिले उनीहरूलाई प्रत्यारोपण गर्न २०७६ साल जेठ २६ गते मात्रै स्वीकृति दिएको मानव बेचबिखन नियन्त्रण ब्युरोको अनुसन्धानले देखाएको थियो।
स्वीकृति पाएको भोलिपल्टै एक जनाको मिर्गौला झिकेर अर्को व्यक्तिमा हालिएको थियो। जसमा अस्पतालका डाक्टर सुप्रभात श्रेष्ठ लगायतकाको टिम संलग्न थियो। बिरामीलाई पहिला नै भर्ना राखेर हतार हतार अस्पतालले मिर्गौला प्रत्यारोपण गरिएको अनुसन्धानबाट खुलेको प्रहरीले बताएको थियो।। सक्कल कागजात नहेरी फोटोकपीमात्र राखेर अस्पतालले सामान्य विवेक पनि प्रयोग नगरी काम गरेको भेटिएको प्रहरीले जनाएको छ।
कलेजका संचालक भारतीय नागरिक नागेन्द्र पम्पाटी र भि नटराज हुन् ।
