३० साउन, काठमाडौं ।
सरकारले मास्क प्रयोग नगर्ने ४ लाख १९ हजार व्यक्तिलाई नियन्त्रणमा लिएर कारबाही गरेको छ । सरकारले नेपालमा फैलँदै गएको कोभिड–१९ का कारण बन्दाबन्दी गरेपछि मास्कको प्रयोग नगर्ने देशभरका व्यक्तिलाई नियन्त्रणमा लिई सम्झाईबुझाई छोड्नाका साथै जरिवनासमेत गरेको हो ।
गृह मन्त्रालयले बिहीबार जारी गरेको विज्ञप्तिमा मास्क प्रयोग नगर्ने ४,१९,५३८ जनालाई नियन्त्रणमा लिएर ३,५४,५८३ सम्झाई बुझाई छाडिएको र ३९,५०७ जनालाई मास्क वितरण गरी सम्झाई बुझाई गरेर छाडिएको जनाईएको छ । त्यस्तै २५,२०७ जनालाई भने जरिवाना तिराईएको छ ।
गृह मन्त्रालयका अनुसार अनुमति विना काठमाडौँ उपत्यका प्रवेश गर्न खोज्ने १९,४८३ यात्रु र ७,६३५ सवारी साधन प्रवेश नाकाबाटै फिर्ता गरिएको छ ।
मन्त्रालयले कोभिड–१९ को बढ्दो सङ्क्रमण नियन्त्रणका लागि जारी निर्देशनको कडाइपूर्वक कारबाही गर्ने कार्य निरन्तर जारी रहेको जनाएको छ । यातायातमा जोरबिजोर प्रणालीको पालना गर्ने, अनिवार्यरुपमा माक्सको प्रयोग गर्ने, भौतिक दुरीको पालना गर्ने लगायत निर्देशनलाई प्रभावकारी रुपमा कार्यान्वयन गराउन काठमाडौँमा ५ वटा, ललितपुर र भक्तपुरमा ४÷४ वटा अनुगमन टोली परिचालन गरी कारबाही तीव्र बनाईएको जनाएको छ ।
गृहले स्वास्थ्य मन्त्रालयद्वारा जारी जनस्वास्थ्य मापदण्ड र गृह मन्त्रालयद्वारा जारी सुरक्षा मापदण्डको पूर्ण रुपमा पालना गर्न सबैलाई आग्रहसमेत गरेको छ ।
