३२ साउन, नवलपरासी । पश्चिम नवलपरासीमा आजदेखि भदौ ६ गतेसम्म लागु हुनेगरी निषेधाज्ञा जारी गरिएको छ ।
जिल्ला प्रशासन कार्यालयले आइतबारदेखि भदौ ६ गतेसम्म जिल्लाभर निषेधाज्ञा जारी गरेको जनाएको छ। जिल्लाको रामग्राम नगरपालिकाको परासी क्षेत्र कोरोना संक्रमणको उच्च जोखिममा छ।
समुदायमा कोरोनाको अवस्था पत्ता लगाउन गरिएको नमूना स्वाव संकलनपछि परीक्षण गर्दा परासी क्षेत्रमा कोरोनाको जोखिम उच्च रहेको पाइएको हो ।
उक्त नमूना परीक्षणमा परासी क्षेत्रमा ५ जनामा कोरोना पुष्टि भएको थियो। तीमध्ये ३ जनामा लक्षणसहितको कोरोना संक्रमण देखिएको छ।
लक्षण सहितको कोरोना संक्रमण पुष्टि हुनेमा एक पूर्वमन्त्रीसहित राजनीतिक दलका नेता रहेका छन्। उनीहरुमध्ये एक जनाको बुटवल, दुई जनाको काठमाडौं र ललितपुरका अस्पतालमा उपचार भइरहेको जिल्ला स्वास्थ्य कार्यालयले जनाएको छ।
अत्यावश्यक सेवाका सवारीसाधन बाहेक सार्वजनिक तथा निजी सवारी साधन संचालन र सर्वसाधारणको आवतजावतमा रोक लगाइएका छन् ।
समुदायस्तरको परीक्षणका क्रममा रामग्राम नगरपालिकाका दुई कर्मचारी, एक जनप्रतिनिधि र सर्वसाधारणमा कोरोना पोजेटिभ देखिएको छ।
त्यसैगरी सुस्ता गाउँपालिकाको नर्सही स्वास्थ्य चौकीमा कार्यरत एक अनमीमा पनि कोरोना पोजेटिभ देखिएको छ। कर्मचारीहरुमा कोरोना संक्रमण देखिएपछि नगरपालिका र स्वास्थ्य चौकी शिल गरिएको छ।
