३२ साउन, काठमाडौं । मध्यपुर थिमी नगरपालिकाले आजबाट भदौ ९ गतेसम्मका लागि लकडाउन लागु गरेको छ । लकडाउनपछि नगरपालिका क्षेत्र ठप्प छ ।
समुदायस्तरमा कोरोना फैलिएपछि नगरपालिकाले आगामी भदौ ९ गतेसम्मका लागि लकडाउन गरेको हो । नगरपालिका क्षेत्रभित्र हालसम्म ४१ जना कोरोना सङ्क्रमित पुष्टि भएपछि लकडाउन गरिएको नगर प्रमुख मदनसुन्दर श्रेष्ठले जानकारी दिए ।
पसल, व्यवसाय ठप्प भएको छ । अत्यावश्यक सामान खाद्यान्न, पानी, ग्यास र औषधि पसल बिहान ११ बजेदेखि दिउँसो १ बजेसम्म दुई घण्टा मात्रै खोल्न दिइएको छ ।
अरनिको राजमार्गमा कुनै पनि सवारीसाधन रोक्न, यात्रु चढाउन र ओराल्न नपाइने गरी लकडाउन गरिएको जानकारी दिँदै प्रमुख श्रेष्ठले नगरपालिका क्षेत्रभित्रका सडकमा अत्यावश्यक सवारी साधनबाहेकका सवारीसाधन सञ्चालनमा पूर्णरुपमा रोक लागेको जानकारी दिए।
