योगेन्द्र योगी
२२ भदौ, दोहा ।
कोरोना भाइरस लगायत अन्य विभिन्न कारणले कतारबाट स्वदेश फर्किन नसकेका नेपाली नागरिकहरू मध्ये नेपाली दूतावासको समन्वय र नेपाल सरकारको सहजीकरण मार्फत आइतबार र सोमबार गरी ३०१ जना नेपाली स्वदेश फर्किए छन् ।
आइतबार हिमालय एयरलाइन्सको उडानबाट १५६ जना र सोमबार हिमालय एयरलाइन्सबाटै १४५ गरि ३०१ जना नेपाली स्वदेश फर्किएको कतारस्थित नेपाली दूतावासका द्वितीय सचीव प्रबीण भट्टराईले जानकारी दिए ।
दूवै उडानमा समावेश भएका सबै नेपालीहरूले कोभिड – १९ परीक्षण गरी पीसी आर नेगेटिभ भएको प्रमाणपत्रसहित यात्रा गरेको सचीव भट्टराईले बताए ।
स्वदेश फर्कन लागेहरुको यात्रा सहजिकरणका तथा बिदाईका लागि सचीव भट्टराई, नेपाली दूतावासका कर्मचारी लगायत नेपाली समुदायका प्रतिनिधिहरु हमाद अन्तर्राष्ट्रिय विमानस्थल पुगेका थिए ।
यसैगरी, दूतावासका अनुसार हिमालय एयरलाइन्सको दोहा–काठमाण्डौ सेक्टरका लागि सेप्टेम्बर ८ र २३ तारिखमा उडान गर्ने तय भएको जनाएको छ । कोरोनाका कारण रोजगारी गुमाएर स्वदेश फर्किने नेपाली श्रमिकहरुको संख्या बढीरहेको दूतावासले जनाएको छ ।
