२४ भदौ, काठमाडौं ।
प्रमुख प्रतिपक्षी कांग्रेसका सांसद तथा पूर्वस्वास्थ्यमन्त्री गगन थापाले कोरोना भाइरस (कोभिड–१९) को संक्रमण रोकथाम, नियन्त्रण र संक्रमितको उपचारमा सरकारको उपस्थिति नदेखिएको बताएका छन् । सामाजिक संजालमार्फत एक विज्ञप्ति सार्वजनिक गर्दै सरकारमा रहेको राजनीतिक नेतृत्व संकटका बेला नदेखिएको बताएका हुन् ।
प्रमुख जिल्ला अधिकारीको माध्यमबाट निषेधाज्ञा लगाएर मात्रै समस्याको समाधान नहुने बताउँदै थापाले संकटमा सरकारको नेतृत्वको प्रभावकारीता र उपस्थितिमाथि प्रश्न उठाउनुपर्ने बेला आइसकेको बताएका छन् । उनले लेखेका छन्, ‘सीडीओ र प्रवक्ताको पछाडि लुकेर बसेको राजनीतिक नेतृत्व दुलोबाट निस्केर नागरिकसँग संवाद गर्ने हिम्मत गरोस् । अनेकन समस्याका बावजुद सिडियोको आदेश मानेर आम नागरिक घर भित्र बसिरहँदा, सरकार के गर्दै थियो त्यो बताओस् ।’
उनले कर्मचारीको अनुहार पछाडि लुकेको देशको राजनीतिक नेतृत्व बालुवाटारमा आइसोलेसनमा बसेको तथा रोग र भोगबाट आहत नागरिकलाई सीडीओ र प्रवक्ताको भरमा छाडेको उनले बताएका छन् । सीडीओको मुखबाट निषेधाज्ञाको आदेश र स्वास्थ्य मन्त्रालयको प्रवक्ताको मुखबाट कोरोना–अपडेट सुनाएर समाधान हुन्छ भन्ने सोच्दा नागरिकको धैर्यताको बाँध कुनैपनि बेला फुट्नसक्ने भन्दै उनले प्रधानमन्त्रीको ध्यानाकर्षण गराएका छन् । थापाले भनेका छन् ‘कोरोना महामारीका सन्दर्भमा सरकारको उपस्थिति केवल दुई स्थानमा भेटिन्छ । पहिलो निषेधाज्ञा घोषणा गर्ने प्रजिअको रूपमा र दोस्रो साँझ ४ बजे कोरोना सम्बन्धी आँकाडा पढ्ने स्वास्थ्य मन्त्रालयका प्रवक्ताको रूपमा । कर्मचारीको अनुहार पछाडि लुकेको देशको राजनीतिक नेतृत्व बालुवाटारमा आईसोलेसनमा छ ।’ उनले थपेका छन्, ‘संसद बन्द गरिएको छ, सरकार एक शब्द बोल्दैन, आमनागरिक र जनप्रतिनिधिको कुरा सरकारसम्म र्पुयाउने सब माध्यम बन्द छन् । अनि प्रजिअको घोषणा र प्रवक्ताको अनुहार हेरेर हामीले सरकार पनि छ है भनेर मान्नु पर्ने ?’
मुलुकको अहिलेको अवस्थामा सरकारले जनताको कुरा नसुन्ने हो भने अवस्था भयावह हुने उनको चेतावनी छ । उनले लेखेका छन्, ‘कर्मचारीको काँधमा बन्दुक राखेर निषेधाज्ञाको गोली मात्रै जनतातर्फ नबर्साउनुहोस् । यस्तै चलिरहने हो भने नागरिकले सरकारको कुरा सुन्न छाड्नेछन् । कोरोनाको अहिलेको अवस्थामा नागरिकले सरकारको कुरा सुन्न छाडे भने देश ठूलो संकटमा फस्नेछ । देशलाई जानी जानी त्यस्तो संकटतर्फ नधकलौं ।’
