२८ भदौ, जनकपुरधाम ।
धनुषामा फेरि दुई समुदायबीच झडप भएको छ। झडपमा परी दुई दर्जनभन्दा बढी स्थानीय घाइते भएका छन् । धनुषाको नगराईन नगरपालिका–७ नवटोलीमा आइतबार शिव मन्दिरमा फोहोर फालिएको विषयलाई लिएर दुई समुदायबीच झडप भएको हो ।
नवटोलीमा रहेको दुधहा पोखरीको डीलमा श्री नवनेश्वर नाथ महादेव मन्दिर निर्माणका लागि गरिएको शिलान्यास स्थलमा आइतबार मुस्लिम पक्षधरहरुले फोहोर फालेको विषयमा विवाद भएको हिन्दु पक्षधरहरुले बताएका छन् । यद्यपि मुस्लिम पक्षधरहरुले दुई महिलाबीचको विवादलाई साम्प्रदायिकताको रंग दिइएको आरोप लगाइएको छ । यता जिल्ला प्रहरी कार्यालय धनुषाका प्रवक्ता प्रहरी नायव उपरीक्षक मकेन्द्रकुमार मिश्रले दुधहा पोखरीको डीलमा मन्दिर निर्माण गर्न नदिने मुस्लिम पक्षधरले अडान लिएपछि विवादको श्रृजना भएको जानकारी दिए ।
दुवै पक्ष बिचको झडपलाई प्रहरीको टोलीले शान्त पारेको र अहिले गाउँमा फेरि अप्रिय घटना हुन नदिनका लागि ३० जनाको प्रहरी टोलीले गस्ती दिइरहेको उनले जानकारी दिए । घटनास्थलमा नेपाल प्रहरी र सशस्त्र प्रहरीका टोलीले गस्ती गरिरहेको छ । यता दूवै पक्ष बिच भएको ढुङगा हानाहानमा दुवै पक्षका २ दर्जनभन्दा बढी व्यक्ति घाइते भएका छन् ।
ढुङ्गा लागेर हिन्दु समुदायका विनय कुमार यादव, राकेश यादव, कृष्णा यादव, सरोज यादव, संजय साफी, मकेश यादव, निभा ठाकुर घाइते भएको स्थानीयको भनाइ छ । त्यस्तै मुस्लिम समुदायबाट जुमैदा खातुन, मैमुन खातुन, मोबारक नदाफ, गुलाम नदाफ, तस्लिम नदाफ, हसिना खातुन, हस्मत खातुन, मुमताज नदाफ, जमाहिर नदाफ, समसुद्दिन नदाफ घाइते भएका छन् । घाइतेहरुको उपचार स्थानीय अस्पतालमा भइरहेको छ । यसअघि शनिबार पनि जनकपुरधामको रुपैठामा दुई समुदायबीच दाहाको विषयलाई लिएर झडप भएको थियो ।
