विराटनगर,बैशाख २४ ः हिन्दु धर्मगुरु श्रीनिवासाचार्यले जनता र हिन्दुधर्मगुरु उक्साउन आफैँले आफुमाथि गोलि प्रहारको योजना बनाएको खुलेको छ ।
गत चैत २५ गते उनीमाथि भएको गोलि प्रहारमा प्रहरीले छान्बिन गर्दा उनकै योजना भएको खुलेको हो ।
केही गर्दा पनि देशलाई हिन्दु राष्ट्र बनाउन नसकेपछि उनले यस्तो योजना बनाएर गोली हान्न लाएको प्रहरीले जनाएको छ ।
श्रीनिवासलाई गोलि हान्ने माधव चौधरीले उनल नैे गोली हान्न सिकाइ धर्म र देशका लागि केही गर्नुपर्छ भनी उक्साई गोलीसहितको पेस्तोल दिई हातैमा हान्न लगाएको प्रहरीको बयानमा भनेका छन् ।
यस्तै ,श्रीनिवासलाई पेस्तोल उपलब्ध गराउने उनका विश्वासपात्र लक्ष्मीराज अधिकारीले घरमा राखिएको गोलीसहितको पेस्तोल गुरु श्रीनिवासाचार्यले भनेपछि पठाएको बताए ।
धर्मसँग जोडिएकाले यो घटनालाई प्रहरीले गम्भीररुपमा अनुसन्धान अघि बढाएको थियो ।
‘हिन्दुराज्य कायम गर्नका लागि विभिन्न चरणमा भएका आन्दोलनले सार्थक रुप नलिएपछि जनता र धर्मगुरुहरुलाई उक्साउनका लागि गुरु श्रीनिवासचार्यले आफ्ना विश्वासपात्र लक्ष्मीराज अधिकारीलाई हतियारको व्यवस्थापन गर्न लगाई गोली समेत हान्ने माधव चौधरीलाई खोजी प्रशिक्षण दिएर घटना गराएको पाइयो’, मोरङ प्रहरी प्रमुख एसपी बिसीले भने ।
‘धर्म र देशको रक्षाका लागि यस्तो गर्नुपरेको हो, केही गर्दा पनि हिन्दु राज्य बनाउन नसकिएपछि जनता र हिन्दु धर्मगुरुहरुलाई उक्साउन मेरै योजनामा आफैँलाई गोली हान्न लगाएको हुँ’, श्रीनिवासाचार्यको बयानबारे एसपी बिसीले भने ।
उनले उपचारका क्रममा सरकार तथा ठुलादलका नेतालाई अपराधि पत्ता नलगाएको भन्दै गाली गर्दै आएका थिए ।
न्युरो हस्पिटलमा उपचार गराएर गोलि लागेको घाउ निको भएपछि काठमाण्डौँ गएका थिए । थप उपचारका लागि भन्दै नयाँ दिल्ली जान लागेको अवस्थामा उनलाई प्रहरीले विमानस्थलबाटै पक्राउ गरेर विराटनगर ल्याएको हो ।
श्रीनिवास सहित उनकै योजनामा गोली हान्ने र पेस्तोल उपलब्ध गराउने अधिकारी र चौधरीलाई पनि प्रहरीले पक्राउ गरी जिल्ला प्रहरी कार्यालय मोरङमा सोमबार सार्वजनिक गरेको छ ।
प्रहरीले अधिकारी र चौधरीलाई वैशाख २० गतेबाट लागू हुने गरी मोरङ जिल्ला अदालतबाट ज्यान मार्ने मुद्दा चलाउन सात दिनको म्याद थपिसकेको छ ।
श्रीनिवासाचार्यमाथि गत चैत २५ गते बिहानको राति १ बजेर ४५ मिनेटमा गोली प्रहार भएको थियो ।
