१६ मंसिर, एजेन्सी ।
उत्तर कोरियाली नेता किम जोङ उनले चीनले निर्माण गरेको कोरोना विरुद्धको भ्याक्सिन लगाएको एक अमेरिकी विशेषज्ञले दाबी गरेको रोयटर्सले उल्लेख गरेको छ।
दुई जापानी जासुसलाई उद्धृत गर्दै अमेरिकाको वासिङ्टनमा रहेको सेन्टर फर नेसनल इन्ट्रेस्ट संस्थाको कोरिया अध्ययन केन्द्रका दक्षिण कोरिया विज्ञ ह्यारी काजिएनिसले किमसँगै उत्तर कोरियालका उच्च अधिकारीहरुले हालै उक्त भ्याक्सिन लगाएको दाबी गरेका हुन्।
उनले किमका परिवारका सदस्यहरुले पनि भ्याक्सिन लगाएको बताएका छन्। ह्यारीले किमलाई दिइएको भ्याक्सिन कुन कम्पनीले निर्माण गरेको हो भन्ने विष्य नखुलेको र त्यो भ्याक्सिन सुरक्षित भएको प्रमाणित भइनसकेको समेत बताएका छन्।
ह्यारीले अनलाइन आउटलेट ‘१९फोर्टीफाइभ’ मा एक लेख लेखेर उक्त दाबी गरेका हुन्। उक्त लेखमा उनले तीनवटा चिनियाँ कम्पनीहरुले भ्याक्सिन बनाइरहेको बताएका छन्।
अमेरिकाका मेडिकल वैज्ञानिक पिटर जे होटेचलाई उद्धृत गर्दै उनले सिनोभाक बायोटेक, कामसिनोबायो र सिजोफर्मा ग्रुपमा भ्याक्सिन निर्माण गरिरहेको उल्लेख गरेका छन्।
यी सबै भ्याक्सिन हाल परीक्षण चरणमा नै छन्। उत्तर कोरियाले भने उक्त दाबीको बारेमा केही बताएको छैन। उत्तर कोरियाले हालसम्म आफ्नो भूमिमा कोरोनाभाइरस संक्रमण देखिएको सार्वजनिक गरेको छैन।
उत्तर कोरियाली अधिकारीहरुले आफ्नो देश संक्रमणबाट मुक्त रहेको दाबी गर्दै आएका छन्।
