१ जेष्ठ, एजेन्सी ।
इजरायल र प्यालेस्टाइनबीच गाजा क्षेत्रमा जारी संघर्षमा परी थप १० जना प्यालेस्टिनीले ज्यान गुमाएका छन्।
गाजाको वेस्ट बैंक क्षेत्रमा भएको उक्त घटनामा परी सयौं घाइते भएको बताइएको छ। इजरायली सेनाले टियर ग्यास, रबरका गोली र आगोका लप्काहरु उक्त क्षेत्रमा प्रहार गरिरहेका छन् भन् प्यालेस्टाइन पक्षले पेट्रोल बम प्रतिकारमा फालिरहेका छन्।
गत सोमवारबाट शुरु भएको दुई देशबीचको अस्त्रयुद्धमा परी हालसम्म गाजा क्षेत्रमा १२६ जनाको मृत्यु भइसकेको छ भने ८ जना इजरायलीको मृत्यु भएको बताइएको छ।
पछिल्लो समय दिनयता हमास र इजरायलले एकअर्कालाई लक्षित गर्दै आक्रमण गर्दै आइरहेका छन्। अझै रातको समयमा दुवै तर्फबाट रकेट आक्रमण हुने क्रम बढ्दो छ। युद्धभूमि झै बनेको गाजा क्षेत्रमा मानिसहरु निदाउन सकेका छैनन्।
राति रकेट आउला र घरमा लाग्ला भनेर बाहिरै बस्न उनीहरु बाध्य छन्। दिउँसोको समयमा पनि उनीहरुलाई राहतको श्वास फेर्ने छुट छैन। रकेट जुनसुकै बेला आउन सक्ने भएकाले सबै जनासँग चनाखो भएर बस्न बाहेक अर्को विकल्प छैन।
रकेट आक्रमणका कारण घरहरु ढलेका भिडियोहरु सार्वजनिक भइरहेका छन्। कतिले यस क्षेत्रबाट सामाजिक सञ्जाल युट्युब, फेसबुकलगायतबाट निरन्तर लाइभ गरिरहेका छन्।
इजरायली आक्रमणमा परेर हमासका वरिष्ठ नेताको समेत मृत्यु भएको छ। जसकारण उक्त क्षेत्रमा तनाव थप बढ्ने अनुमान गरिएको छ।
