बहुमत सचिवालय सदस्यको बैठकअघि ओली-प्रचण्डबीच छलफल

0SHARES

२५ कार्तिक २०७७ नेपाल टाईम्स

२५ कात्तिक, काठमाडौं ।

सत्तारुढ नेपाल कम्युनिस्ट पार्टी (नेकपा)का अध्यक्षद्धय केपी शर्मा ओली र पुष्पकमल दाहाल प्रचण्डबीच भेटवार्ता भएको छ । भेटका लागि प्रचण्ड केही बेरअघि बालुवाटार पुगेको उनका प्रेस संयोजक विष्णु सापकोटा जुगलले जानकारी दिए।

कार्यकारी अध्यक्ष प्रचण्डले सचिवालयको बैठक माग गर्ने चार नेतालाई अपराहृन ४ बजे सचिवालयका धुम्बाराहीस्थित पार्टी कार्यालयमा बोलाएका छन् । त्यसअघि प्रधानमन्त्री एवं अध्यक्ष ओलीलाई भेट्न बालुवाटार पुगेका हुन् ।

भेटमा पार्टीमा देखिएको विवाद र सचिवालय बैठकबारे छलफल हुने बताइएको छ । ओलीसँगको संवादका लागि मंगलबार बिहान शंकर पोखरेलले प्रचण्डलाई आग्रह गरेका थिए। पार्टीको समस्या दुई अध्यक्षको संवादबाटै टुंगिने पोखरेलको भनाइ थियो। ‘दुई अध्यक्ष बसेर छलफल गर्दा समस्या समाधान हुन्छ’, पोखरेलको आग्रह थियो, ‘त्यसैले तपाईंले अध्यक्ष केपी ओलीसँग संवाद गर्नुपर्‍यो।’

गत शनिबार अनौपचारिक बैठक बसेका प्रचण्ड, झलनाथ खनाल, माधव नेपाल, बामदेव गौतम र नारायणकाजी श्रेष्ठ आजको बैठक पनि बस्ने बताइएको छ। प्रधानमन्त्रीलाई सचिवालय बैठक बोलाउन दिइएको समयसीमा सकिनै लाग्दा बहुमत सदस्यको बैठक बस्न लागेको हो।

बैठकको निष्कर्षको आधारमा कार्यकारी अधिकार प्राप्त अध्यक्ष प्रचण्डले सचिवालयको बैठकको मिति तोक्न सक्ने आँकलन गरिएको छ।

विज्ञापन बक्स