२९ साउन, विराटनगर । स्पेनिस क्लब रियल मड्रिडले युरोपियन सुपर कपको उपाधिका लागि बुधबार राति इटालियन क्लब अटलान्टासँग खेल्दै छ । पोल्यान्डको न्यारोडीमा हुने फाइनल खेल नेपाली समयअनुसार भोलि राति १२ः४५ बजे हुने छ ।
युइएफए सुपर कप युरोपका दुई विजेताहरूबीच हुने खेल हो । रियलले च्याम्पियन्स लिग विजेताका रूपमा अनि अटलान्टाले युरोपा कपको विजेताका रूपमा युइएफए सुपरकपको उपाधिका लागि भिड्न आँटेका हुन् ।
रियल पाँच पटकको युइएफए सुपर कपको विजेता टोली हो भने अटलान्टाले अहिलेसम्म उपाधि जित्न सकेको छैन ।
अटलान्टासँगको खेलका लागि रियलले फ्रान्सेली स्टार फुटबलर किलियन एम्बाप्पेलाई मैदान उतार्दै छ । यसै सिजन पेरिस सेन्ट जर्मेन (पिएसजी) बाट बर्नाबेउ आइपुगेका एम्बाप्पेले सोही खेलमार्फत् रियल मड्रिडमा डेब्यु गर्ने छन् ।
