२९ भदौ, दोहा ।
साउदी सरकारले आगामी १ जनवरी देखि कोरोना भाइरस सम्बन्धि लगाएका सबै प्रतिबन्धहरु हटाउने भएको छ । साउदीले १ जनवरी २०२१ पछि नागरिकहरूले साउदी छोड्ने र फर्कने गरि समुद्री र एयरपोर्ट खोल्ने अनुमतिदिन पूर्ण रुपमा प्रतिबन्ध हटाउने निर्णय भएको साउदी प्रेस एजेन्सीले जनाएको छ ।
कोरोना भाइरस सम्बन्धी प्रतिबन्धलाई कम गर्नका लागि यो नयाँ कदमहरूको एक हिस्सा भएको साउदीको आन्तरिक मन्त्रालयले जनाएको छ । अब प्रवासीहरू र भिषाअबधि भएकाहरुले सेप्टेम्बर १५ देखि साउदीमा प्रवेश गर्न पाउने भएका छन् । प्रवासीहरूले प्रवेशका लागि वैध एक्जिट र रिइन्ट्री भिसा, वर्क भिसा, रेसिडेन्सी परमिट र भिसा भएकाहरु सबै कोरोनाभाइरस सम्बन्धी सावधानीका उपायहरू र प्रोटोकलहरू पूरा गरि ४८ घण्टा अघि पीसीआर परीक्षण गरिएको कोरोना नेगेटिभ भएको प्रमाणपत्र देखाउनु पर्ने जनाएको छ ।
कोरोना भाइरस या अन्य कारणले यात्रा प्रतिबन्ध लगाईएका देशहरुको हकमा साउदी सरकारले दिएको यो छुट लागू नहुने जनाएको छ । नयाँ भिसा लगायत अन्य प्रक्रियाबाट साउदी प्रबेश गर्न भने १ जनवरी २०२१ पछिमात्र अनुमति पाउने छन । तर, साउदी सरकारले नेपाललाई प्रतिबन्धको सूचीमा राखेको छ या छैन भन्ने बारे केहि खुलाइएको छैन । यदि प्रतिबन्धको सूचीमा नराखेको भएमा बिदामा गएका नेपाली कामदारहरुले सेप्टेम्बर १५ देखि साउदी प्रवेश गर्न अनुमति पाउने छन् ।
कोरोनाका कारण प्रतिबन्ध लगाएपछि नेपाली कामदार साउदी फर्कन सकेका छैनन् भने साउदीमा विभिन्न कारणले समस्यामा परेका वा रोजगारी गुमाएका हजारौँ नेपाली स्वदेश फर्कन पाएका छैनन् । यसअघि स्वदेश फर्कन नपाएको भन्दै कामदारहरुले नेपाल सरकार तथा साउदीस्थित नेपालीदूतावास बिरुद्ध नाराबाजी गरेका थिए । साउदी अरबमा कानुनी रूपमा करिव ३ लाख १५ हजार नेपाली कार्यरत छन् ।
