२३ साउन, एजेन्सी ।
युक्रेनका राष्ट्रपति भ्लोदोमिर जेलेन्स्कीको ज्यान लिने योजना बनाएको आरोपमा एक जना महिला पक्राउ परेकी छन् । ती महिलाले रूसी योजनामा जेलेन्स्कीको हत्याको षडयन्त्र गरिरहेको आरोपमा युक्रेनी सुरक्षाकर्मीले पक्राउ गरेको अन्तराष्ट्रिय संचारमाध्यमहरुले उल्लेख गरेका छन् ।
उनले गत जुनमा जेलेन्स्कीको माइकोलेभ क्षेत्रको भ्रमणको तालिका पत्ता लगाउने प्रयास गरेकी थिइन् । रूसलाई समर्थन गर्ने स्थानीयले युक्रेनका सैन्य सूचनाहरू मस्को पु¥याउने गरेको आरोप युक्रेनले लगाउँदै आएको छ । सेक्युरिटी सर्भिस अफ युक्रेनले ती महिलाले सैन्य सूचना रूसी गुप्तचरलाई दिइरहेका बेला नै पक्राउ गरिएको बताएको छ ।
गत जुनमा जेलेन्स्कीले बाढी प्रभावित क्षेत्र माइकोलेभको भ्रमण गरेका थिए । उक्त भ्रमणअघि नै ती महिलाबारे सुरक्षा संस्थाले जानकारी पाएका थिए । उनी ओचाकिभ भन्ने सानो सहरमा बस्थिन् । जेलेन्स्की गत जुलाईमा उक्त ठाउँमा गएका थिए । लामो समयसम्म ती महिलामाथि अनुसन्धान गरेपछि सुरक्षाकर्मीलाई उनलाई पक्राउ गरेका हुन् ।
ती महिलामाथि सैनिक र हतियारको आवातजावतबारे अनधिकृत सूचना पठाएको आरोपमा मुद्दा चल्ने छ । दोषी ठहर भएमा उनलाई १२ वर्ष कैद सजाय हुन सक्छ । यसअघि पनि युक्रेनी सेनाले जेलेन्स्कीलाई सिध्याउने गरी रुसले पठाएका गुप्तचरलाई पक्राउ गरेको थियो । रुसले पटक पटक आफ्ना राष्ट्रपतिको हत्या गर्ने गरी योजना बनाएपनि तिनलाई असफल बनाउँदै आएको युक्रेनी सेनाले बताएको छ ।
