६ असोज, काठमाडौं । काठमाडौंको नागढुंगादेखि धादिङको सिस्नेखोला जोड्ने सुरुङ मार्ग बनाउन सोमबार सम्झौता हुने भएको छ ।
२ दशमलव ६ किलोमिटर लामो यो सुरुङ जापानी कम्पनी हाज्मा–आन्द्रो जेभीले निर्माण गर्न लागेको हो । निर्माण सुरू भएको ४२ महिनामा सक्ने भनिएको सुरुङ मार्ग समयमै सकिए नेपालको पहिलो सडक सुरुङ मार्ग हुनेछ ।
आयोजना निमार्णका लागि जापानी अन्तराष्ट्रिय सहयोग नियोग (जाइका)को आर्थिक सहयोग हुनेछ । यसअघि नै जाइकासँग १६ अर्ब ऋण सम्झौता भइसकेको छ ।
सोमबार सम्झौता भए पनि निर्माण सुरू गर्न केही समय लाग्ने आयोजना प्रमुख श्याम खरेलले बताए । धादिङतर्फको जग्गा विवादका कारण निर्माण प्रकृया पछि धकेलिँदै आएको थियो।
त्यहाँका स्थानीयले काठमाडौंतर्फकै मूल्यमा जग्गाको मुआब्जा माग गरेपछि जग्गा सम्झौता हुन सकेको थिएन । गत साउन २१ मा सरकारले प्रस्ताव गरेको दरमा नै स्थानीयले मुआब्जा लिन मानेपछि प्रकृया अघि बढेको थियो ।
