१९ साउन, काठमाण्डौ।
दाङको तुलसीपुरमा सवारीसहितको अटो रिक्सा खोलाले बगाएको छ । जसमा परि बेपत्ता भएका दुई जनामध्ये एक महिलाको शव फेला परेको छ । तुलसीपुर–४ खाद्रे निवासी ५५ वर्षीया सीता आले तुलसीपुर–१५ ग्वारखोलामा मृत भेटिएको इलाका प्रहरी कार्यालयले जनाएको छ । प्रहरीका अनुसार तुलसीपुर बजारबाट खाद्रेतर्फ जाँदै गरेको रा १ ह ४०५५ नम्बरको अटो रिक्सालाई तुलसीपुर–४ मा रहेको बेचनी खोलाले हिजो साँझ सवा ८ बजेको समयमा बगाएको थियो ।
सोही अटोमा रहेका ५ जना मध्ये अन्य ३ जना खोलाबाट बाहिर निस्कन सफल भए पनि सीतासहित दुई जनालाई खोलाले बगाएको थियो । उनको शव आज बिहान ७ बजेको समयमा फेला परेको र मृतकका आफन्तले सनाखत गरेको प्रहरीले जनाएको छ । घटनामा बेपत्ता रहेकी सुर्खेत घर भई अहिले खाद्रे बस्दे आएकी १६ वर्षीया मन्जु खड्काको खोजी भइरहेको प्रहरीले जनाएको छ ।
यसैगरी शुक्रबार राति नै तुलसीपुरबाट बिजौरीतर्फ गइरहेको रा १ ह २३५७ नम्बरको अटोलाई तुलसीपुर–७ पर्सेनीस्थित काला खोलाले बगाएर चालक पर्सेनी निवासी दुर्गाबहादुर पुन घाइते भएका छन् । उनलाई अटोसहित १ सय मिटर तल बगाएकोमा उद्धार गरिएको हो । घाइते पुनको राप्ती प्रादेशिक अस्पताल तुलसीपुरमा उपचार भइरहेको छ । उता रोल्पामा पहिरोले घर पुरिँदा दुई जनाको ज्यान गएको छ ।
पहिरोमा घरसँगै पुरिँदै बेपत्ता रहेका हजुरआमा र नातिनी दुवै जनाको शव भेटिएको छ । सिउरी पहिरोमा परेका मध्ये झन्डै ७० वर्षीया बसुना सुनारको शव शनिबार बिहान पहिला फेला परेको हो । पहिरो पन्छाउने क्रममा उनी नातिनी मायाको शव पनि फेला परेको रोल्पा प्रहरीले जनाएको छ । जिल्लाको सुनछहरी गाउँपालिका– ४ कामी डाँडामा २४ वर्षीय देउसिंह कामीको घर पहिरोले पुर्दा उनकी आमा र छोरी बेपत्ता भएका थिए ।
शुक्रबार राति माथिबाट झरेको पहिरोका कारण देउसिंहको एक तले कच्ची घर पुरिएको थियो । शुक्रबार देउसिंह र उनकी श्रीमती भने घरमा थिएनन् । उनीहरू कामको शिलशिलामा बाहिर रहेका कारण जोगिएको प्रहरीले जनाएको छ । यसबीच आज पनि देशका केही जिल्लाका नदी तथा खोलामा बाढीको सम्भावना रहेको छ । इलाम, झापा, कैलाली, कञ्चनपुर र आसपासका जिल्ला भएर बग्ने नदी तथा खोलामा आज आकस्मिक बाढीको जोखिम रहेको हो ।
जल तथा मौसम विज्ञान विभागका अनुसार आगामी तीन दिन कोसी, नारायणी, कर्णाली, महाकाली र यसका प्रमुख सहायक नदीहरूमा जलसतह सतर्कता तहभन्दा तलै रहने पूर्वानुमान छ । कन्काई, कमला, वाग्मती, पूर्वी राप्ती, पश्चिम राप्ती र बबई नदीको जलसतह सतर्कता तह तलै रहने विभागले जनाएको छ । यस्तै अहिले कोशी र लुम्बिनी प्रदेशका केही स्थान र बाँकी प्रदेशका थोरै स्थानहरुमा हल्कादेखि मध्यम वर्षा भइरहेको छ ।
महाशाखाका अनुसार शनिबार दिउँसो देशभर आंशिकदेखि साधारणतया बदली रहने छ । कोशी, बागमती, गण्डकी, लुम्बिनी र सुदूरपश्चिम प्रदेशका केही स्थानहरू तथा मधेस र कर्णाली प्रदेशका थोरै स्थानहरूमा मेघ गर्जन÷चट्याङ्गसहित हल्कादेखि मध्यम वर्षाको सम्भावना रहेको छ ।
महाशाखाले दिउँसो कोशी,गण्डकी,लुम्बिनी र सुदूरपश्चिम प्रदेशका एक–दुई स्थानमा दिउँसो भारी वर्षाका साथै कोशी प्रदेशका एक–दुई स्थानमा धेरै भारी वर्षा हुने पूर्वानुमान गरेको छ । राति पनि देशभर आंशिकदेखि साधारणतया बदली रही कोशी, बागमती, गण्डकी प्रदेशका केही स्थानहरू तथा बाँकी प्रदेशका थोरै स्थानहरूमा मेघ गर्जन÷चट्याङ्ग सहित हल्कादेखि मध्यम वर्षाको सम्भावना रहेको महाशाखाले जनाएको छ । कोशी र गण्डकी प्रदेशका एक–दुई स्थानमा राति पनि भारी वर्षा हुने महाशाखाले पूर्वानुमान गरेको छ ।
