१ असार, एजेन्सी । स्पेनिस ला–लिगा फुटबलमा उपाधि दावेदार मानिएको रियल म्याड्रिडले एइबरलाई पराजित गरेको छ ।
गएराति आफ्नै अस्थायी घरेलु मैदानमा भएको खेलमा रियल म्याड्रिडले एइबरलाई ३–१ ले हराएको हो ।
खेलमा रियललाई विजयी गराउन टोनी क्रस, सर्जियो रामोस र मार्सेलोले एक एक गोल गरे ।
एइबारका पेड्रो बिगासले एक गोल फर्काए । जितपछि दोस्रो स्थानको रियल म्याड्रिडले शीर्ष स्थानको बार्सिलोनामाथिको दबाब कायम राखेको छ ।
लिगमा २८ खेलबाट रियल म्याड्रिडको ५९ अंक भएको छ । समान खेलबाट बार्सीलोनाको ६१ अंक छ ।
रियल म्याड्रिडले गएरातीको खेल आफ्नो प्रशिक्षण मैदान ‘डि स्टाफानो’ मा खेलेको थियो । मुख्य रंगशाला सान्टीयागो बर्नाबेउमा निर्माण कार्य चलिरहेकोले रियलले यो सिजनका बाँकी घरेलु खेलहरु ट्रेनिङ ग्राउण्डमा खेल्दैछ ।
ला लिगा फुटबल अन्तर्गत गएराति भएका अन्य खेलहरुमा एथ्लेटिक बिल्बाओ र एथ्लेटिको म्याड्रिड तथा रियल सोसीडाड र ओसासुनाले एक एक गोलको बराबरी खेलेका छन् ।
