२२ असाेज, काठमाडौं।
नेपाल कम्युनिष्ट पार्टी (नेकपा) अध्यक्ष एवं प्रधानमन्त्री केपी ओली र पुष्पकमल दाहाल ‘प्रचण्ड’बीच बालुवाटारमा छलफल भएकाे छ । विहान साढे ११ बजेदेखि दुवै शीर्ष नेताले मन्त्रिपरिषद पुनर्गठन लगायतका विषयमा छलफल गरेको प्रधानमन्त्री सचिवालयले जनाएको छ।
गएको मंगलबार बसेको सचिवालय बैठकमा यसअघि असोज ६ गतेको बैठकले दिएको जिम्मेवारीअनुसार मन्त्रिपरिषद पुनर्गठन, संवैधानिक निकायमा पदपूर्ति तथा पार्टीको सांगठनिक एकतामा दुई अध्यक्षबीच गृहकार्य गर्न बाँकी रहेकाले त्यसै विषयमा केन्द्रित भएर छलफल भइरहेको बताइएको छ ।
अन्तरपार्टी निर्देशनमा दुबैजना अध्यक्षले असोज मसान्तभित्र पार्टीको सांगठनिक एकताको काम सम्पन्न हुने प्रतिवद्धता जनाइसकेका छन् ।
असोज ६ गते बसेको सचिवालय बैठकले १० दिनको समय दिएर सहमतिको खाका बनाउने जिम्मेवारी दुई अध्यक्षलाई दिएको थियो । सचिवालय बैठकले दिएको १० दिनको समय घर्किसकेकाले जिम्मेवारीअनुसार सहमतिको आधार बनाउने चटारो दुई अध्यक्षलाई छ । नियमितजसो दुई अध्यक्षबीच छलफल भएपनि ठोस आधार तयार नभएको सचिवालयका सदस्यहरुको बुझाई छ ।
